Utaridi 2.0 Staging

Blog

  • Iran: Golan ni ya Syria, Netanyahu Hana Mamlaka Juu ya Kuundwa kwa Taifa Huru la Palestina

    Iran: Golan ni ya Syria, Netanyahu Hana Mamlaka Juu ya Kuundwa kwa Taifa Huru la Palestina

    Taarifa ya Wizara ya Mambo ya Nje ya Iran:

    🔹 Wizara ya Mambo ya Nje ya Jamhuri ya Kiislamu ya Iran imelaani vikali kauli za Waziri Mkuu wa Israel, Benjamin Netanyahu, kwamba Milima ya Golan ya Syria itabaki kuwa sehemu ya Israel milele, pamoja na msimamo wake wa kupinga kuundwa kwa taifa huru la Palestina.

    🔹 Wizara hiyo imesema Netanyahu “hayuko katika nafasi ya kutoa kauli kuhusu kuundwa kwa taifa huru la Palestina,” ikisisitiza kuwa ardhi ya Palestina ni ya watu wa Palestina na kwamba, kwa mtazamo wa Tehran, misimamo ya Israel haiwezi kubadilisha ukweli huo.

    🔹 Aidha, Iran imesisitiza kuwa Milima ya Golan ni sehemu isiyotenganishwa ya ardhi ya Syria, na kwamba madai au malengo ya Israel hayawezi kubadilisha hali yake ya kisheria na kihistoria.

    🔹 Katika muktadha huo, Iran imelaani hatua ya hivi karibuni ya serikali ya Colombia ya kutambua mamlaka ya Israel juu ya eneo la Golan linalokaliwa. Tehran imesema hatua hiyo inakiuka kanuni za msingi za Mkataba wa Umoja wa Mataifa na sheria za kimataifa kuhusu kuheshimu mamlaka na uadilifu wa mipaka ya nchi.

    🔹 Wizara hiyo pia imesisitiza kile ilichokitaja kuwa wajibu wa kisheria, kimaadili na kibinadamu wa mataifa yote, hususan nchi za Kiislamu, kuwasaidia Wapalestina kufikia haki yao ya kujiamulia mustakabali wao na kukomesha ukaliaji wa Israel.

    🔹 Iran pia imeitaka Baraza la Usalama la Umoja wa Mataifa kutekeleza wajibu wake wa kukomesha ukaliaji na mashambulizi ya Israel dhidi ya maeneo ya Palestina, Lebanon, Syria na nchi nyingine za eneo hilo.

    🔹 Kwa mujibu wa taarifa hiyo, suala la Palestina linaendelea kuwa mojawapo ya masuala muhimu zaidi ya kibinadamu na kimaadili duniani. Iran imeilaumu Marekani pamoja na baadhi ya mataifa ya Magharibi, yakiwemo Uingereza, Ufaransa, Ujerumani na Canada, kwa kuiunga mkono Israel na kuchangia kile ilichokitaja kuwa kutowajibishwa kwake.

    🔹 Mwishoni, Iran imesisitiza tena uungaji mkono wake kwa mapambano ya Wapalestina ya kukomesha ukaliaji, kurejea kwa wakimbizi wa Kipalestina katika ardhi yao, haki ya kujiamulia mustakabali wao na kuundwa kwa taifa huru la Palestina lenye Jerusalem (Al-Quds) kama mji mkuu wake.

    Chanzo: Tasnim News

  • Putin aonya nchi za magharibi “meli zetu sio shamba la bibi, mkizikamata na sisi tutakamata za kwenu”

    Putin aonya nchi za magharibi “meli zetu sio shamba la bibi, mkizikamata na sisi tutakamata za kwenu”

    Rais Vladimir Putin ameonya kuwa Russia itajibu kwa hatua sawia iwapo nchi za Ulaya zitaanza kukamata meli za kibiashara za Russia, akisema Moscow inaweza kuchukua hatua hiyo hata katika maeneo tofauti na ambako meli zake zitazuiliwa.

    Akizungumza wakati wa mazoezi ya Jeshi la Wanamaji la Russia katika eneo la Sakhalin, Putin alizishutumu baadhi ya nchi kwa kukiuka sheria za kimataifa za baharini kwa kujaribu kuzuia usafiri wa meli za Russia na kujadili uwezekano wa kuzikamata na kuuza mali zake. Aliita hatua hiyo “uharamia na wizi.”

    Putin alisema iwapo hatua hizo zitaanza kutekelezwa kwa vitendo, Russia italazimika kujibu “kwa namna ileile,” na kwamba majibu hayo hayatalazimika kufanyika katika eneo lilelile ambako meli za Russia zimezuiliwa, bali “popote” Moscow itakapoona inafaa.

    Kamanda wa Jeshi la Wanamaji la Pacific, Admiral Viktor Liina, pia alimwambia Putin kuwa Russia ina uwezo wa kukagua na kuzuilia meli za nchi inazozitaja kuwa zisizo rafiki, akidai kuwa baadhi ya mataifa ya Magharibi hutumia meli zilizosajiliwa chini ya bendera za nchi nyingine kusafirisha bidhaa zao.

  • Washington Post: Mashambulizi ya Iran Jordan yaonyesha uwezo wake wa kijeshi umeimarika kwa kasi

    Washington Post: Mashambulizi ya Iran Jordan yaonyesha uwezo wake wa kijeshi umeimarika kwa kasi

    Mashambulizi ya Iran dhidi ya kituo cha kijeshi cha Marekani nchini Jordan, yaliyosababisha vifo vya wanajeshi watatu wa Marekani Julai 17, yanaonyesha jinsi uwezo wa Tehran katika matumizi ya makombora na ndege zisizo na rubani ulivyobadilika kwa kasi, kwa mujibu wa tathmini ya The Washington Post.

    Ripoti hiyo inaeleza kuwa Iran imeboresha uwezo wake wa kupanga mashambulizi kwa kutumia mchanganyiko wa makombora na droni kwa namna inayoweza kuzidi uwezo wa mifumo ya ulinzi wa anga ya Marekani na washirika wake. Uchunguzi mwingine wa Washington Post ulibaini uharibifu katika maeneo 15 ya kijeshi ya Marekani, huku wataalamu wakisema kiwango cha uharibifu kilionyesha Washington ilikosea katika tathmini ya uwezo wa Iran kulenga kwa usahihi.

    Changamoto hiyo imeongezwa na matumizi makubwa ya makombora ya kuzuia mashambulizi. Tathmini za Pentagon zilizonukuliwa na gazeti hilo zilionyesha Marekani ilitumia zaidi ya makombora 200 ya THAAD—takribani nusu ya akiba yake wakati huo—pamoja na zaidi ya makombora 100 ya SM-3 na SM-6 katika operesheni za kujilinda dhidi ya mashambulizi ya Iran.

    Mapema katika vita, maafisa walikuwa tayari wameonya kuwa kasi ya matumizi ya makombora ya hali ya juu inaweza kulazimisha jeshi la Marekani kuanza kuchagua ni mashambulizi gani ya kuyazuia iwapo mapigano yangedumu kwa muda mrefu. Pentagon, hata hivyo, imekuwa ikisisitiza kwamba bado ina uwezo wa kutosha wa kijeshi na inaongeza uzalishaji wa silaha.

  • Hamas yaunga mkono wazo la kuijumuisha Gaza katika makubaliano mapana ya kusitisha vita kikanda

    Hamas yaunga mkono wazo la kuijumuisha Gaza katika makubaliano mapana ya kusitisha vita kikanda

    Hamas imesema inaunga mkono kwa nguvu kauli za Katibu wa Baraza Kuu la Usalama wa Taifa la Iran, Mohsen Rezaei, kuhusu umuhimu wa kumaliza vita katika eneo lote la Mashariki ya Kati, ikiwemo Gaza na Lebanon.


    Katika taarifa yake, Hamas imesema kusitishwa kwa vita hizo kutakuwa na manufaa makubwa kwa watu wa eneo hilo na mustakabali wake, huku ikihoji kuwa kuendelea kwa mapigano kunanufaisha mipango ya Israel ya kuongeza mgawanyiko na ukosefu wa utulivu katika eneo hilo.


    Kauli hiyo inakuja wakati Tehran ikisisitiza kuwa suluhu yoyote pana kati yake na Marekani haiwezi kutenganishwa na migogoro mingine ya kikanda. Rezaei amekuwa akihusisha masharti ya Iran katika mazungumzo na suala la kusitishwa kwa mapigano Gaza na Lebanon.

  • Mfahamu mwanasiasa wa Uganda anayegombea nafasi ya katibu mkuu wa Umoja wa Mataifa

    Mfahamu mwanasiasa wa Uganda anayegombea nafasi ya katibu mkuu wa Umoja wa Mataifa

    Uganda imemuidhinisha mwanadiplomasia na mwanasiasa mkongwe Olara Otunnu kuwa mgombea wake katika kinyang’anyiro cha nafasi ya Katibu Mkuu ajaye wa Umoja wa Mataifa (UN).

    Otunnu, ambaye anaungwa mkono na serikali ya Uganda, yuko mjini New York kwa ajili ya kukutana na ujumbe wa nchi wanachama na kufanya mazungumzo na wawakilishi wa Mkutano Mkuu wa Umoja wa Mataifa pamoja na Baraza la Usalama la UN, kwa mujibu wa Balozi wa Kudumu wa Uganda katika Umoja wa Mataifa, Adonia Ayebare.

    Ayebare amesema safari hiyo inalenga kumpa Otunnu fursa ya kuwasilisha maono yake na kushiriki mazungumzo ya moja kwa moja na wadau muhimu katika mchakato wa kumpata kiongozi mpya wa Umoja wa Mataifa.

    Olara Otunnu ana uzoefu mkubwa katika diplomasia ya kimataifa. Alisoma katika Chuo Kikuu cha Oxford na Shule ya Sheria ya Harvard (Harvard Law School), kabla ya kuanza kazi yake katika masuala ya kimataifa.

    Kati ya mwaka 1980 na 1985, Otunnu aliwahi kuwa mwakilishi wa Uganda katika Umoja wa Mataifa, ambapo alihudumu kwa kipindi cha mwaka mmoja kama Rais wa Baraza la Usalama la Umoja wa Mataifa.

    Pia aliwahi kushika nafasi ya Naibu Katibu Mkuu wa Umoja wa Mataifa anayehusika na Watoto na Migogoro ya Kivita kati ya mwaka 1997 na 2005, akiongoza juhudi za kimataifa za kulinda watoto katika maeneo yenye vita.

    Katika kinyang’anyiro hicho, Otunnu anatarajiwa kutumia uzoefu wake wa muda mrefu katika diplomasia, usuluhishi wa migogoro na masuala ya amani ili kujenga uungwaji mkono kutoka mataifa mbalimbali.

  • CNN: Mkuu wa Majeshi ya Marekani ashauri Washington kutafuta njia ya kujiondoa katika vita na Iran

    CNN: Mkuu wa Majeshi ya Marekani ashauri Washington kutafuta njia ya kujiondoa katika vita na Iran

    Kwa mujibu wa CNN, Mwenyekiti wa Wakuu wa Majeshi ya Marekani, Jenerali Dan Caine, amewaeleza kwa faragha baadhi ya washauri wakuu wa Rais Donald Trump kwamba Washington inahitaji kutafuta “njia ya kutoka” katika vita vinavyoendelea na Iran.

    CNN imeripoti kuwa Caine anaamini chaguzi zilizopo za kuongeza mashambulizi zinaweza kuleta madhara makubwa zaidi, huku akisisitiza kuwa nguvu za anga pekee haziwezi kwa uwezekano mkubwa kufanikisha malengo yaliyowekwa na Trump dhidi ya Iran.

    Kwa mujibu wa vyanzo vilivyonukuliwa katika ripoti hiyo, Caine amekuwa akijadiliana kuhusu hali hiyo na maafisa wengine wakuu wa utawala, wakiwemo Mkurugenzi wa CIA John Ratcliffe, Waziri wa Mambo ya Nje Marco Rubio na Makamu wa Rais JD Vance, huku lengo likiwa kueleza mipaka na hatari za chaguzi mbalimbali za kijeshi.

    Msemaji wa Caine hakuthibitisha maelezo ya mazungumzo hayo, akisema ofisi yake haizungumzi hadharani mawasiliano ya siri kati ya mwenyekiti huyo, rais na viongozi wengine wa juu.