Utaridi 2.0 Staging

Blog

  • Afrika Kusini Yakanusha Kutengwa Barani Afrika Baada ya Maandamano Dhidi ya Wahamiaji

    Afrika Kusini Yakanusha Kutengwa Barani Afrika Baada ya Maandamano Dhidi ya Wahamiaji

    PRETORIA, Afrika Kusini – Ofisi ya Rais wa Afrika Kusini imekanusha madai kwamba nchi hiyo inaanza kutengwa na mataifa mengine ya Afrika kufuatia maandamano ya hivi karibuni dhidi ya wahamiaji, ikisema serikali inaendelea kushirikiana kikamilifu na bara hilo pamoja na jumuiya ya kimataifa.

    Akizungumza katika mkutano na waandishi wa habari, Msemaji wa Rais, Vincent Magwenya, alisema kuna kampeni endelevu inayolenga kuionyesha Afrika Kusini kama “nchi iliyotengwa,” licha ya serikali kulaani mara kwa mara mashambulizi dhidi ya raia wa kigeni.

    Magwenya alisema serikali itaendelea kutekeleza sheria za uhamiaji kwa kuzingatia Katiba, huku ikihakikisha kuwa haki na usalama wa raia wa kigeni wanaoishi nchini humo vinalindwa.

    “Kuna juhudi za kuifanya Afrika Kusini ionekane kama nchi iliyotengwa, licha ya msimamo wa serikali wa kulaani mashambulizi dhidi ya wageni na kutekeleza sheria za uhamiaji kwa mujibu wa Katiba,” 

    alisema Magwenya.

    Aidha, aliwashutumu wakosoaji kwa kupotosha taarifa kuhusu mahusiano ya kidiplomasia ya nchi hiyo kwa lengo la kujenga picha kwamba Afrika Kusini inakwepwa na washirika wake wa kikanda na kimataifa.

    Kwa mujibu wa Magwenya, mikutano ya hivi karibuni ya Rais Cyril Ramaphosa na viongozi wa kimataifa, ikiwemo mazungumzo yake na Rais wa Ufaransa Emmanuel Macron, inaonyesha kuwa Afrika Kusini bado ina nafasi muhimu katika masuala ya Afrika na dunia kwa ujumla.

    Kauli hiyo inakuja wakati maandamano dhidi ya wahamiaji yakiibua mjadala kuhusu usalama wa raia wa kigeni, utekelezaji wa sheria za uhamiaji na taswira ya Afrika Kusini katika bara hilo.

    Serikali sasa inatarajiwa kuendelea kusawazisha utekelezaji wa sheria za uhamiaji na juhudi za kuzuia chuki dhidi ya wageni, huku ikidumisha mahusiano yake ya kidiplomasia na mataifa mengine ya Afrika.

  • JD Vance Israel inafadhili kampeni ya kunishambulia mtandaoni w

    JD Vance Israel inafadhili kampeni ya kunishambulia mtandaoni w

    WASHINGTON, Julai 16 – Makamu wa Rais wa Marekani, JD Vance, amedai kuwa Israel inafadhili baadhi ya washawishi wa mitandao ya kijamii (social media influencers) ili kumshambulia kutokana na msimamo wake wa kuunga mkono mazungumzo na Iran pamoja na kuweka mbele juhudi za amani badala ya mivutano ya kijeshi.


    Vance alitoa kauli hiyo akieleza kuwa mashambulizi dhidi yake mtandaoni yanahusishwa na msimamo wake kuhusu diplomasia na mazungumzo kati ya Marekani na Iran. Hata hivyo, hakuwasilisha ushahidi hadharani kuthibitisha madai hayo.


    “Israel inalipa washawishi wa mitandao ya kijamii kunishambulia kwa sababu ninatetea mazungumzo na Iran na ninatanguliza amani,”

    Vance alinukuliwa akisema.
    Kauli hiyo imezua mjadala mpana kuhusu nafasi ya mitandao ya kijamii katika siasa za kimataifa na tofauti za mitazamo kuhusu sera ya Marekani kuelekea Mashariki ya Kati, hususan uhusiano wake na Israel na Iran.
    #utaridi

  • Iran yaonya mkishambulia miundombinu yetu tutashambulia miundombinu yote ya Kanda

    Iran yaonya mkishambulia miundombinu yetu tutashambulia miundombinu yote ya Kanda

    TEHRAN, Julai 16 – Msemaji wa Makao Makuu ya Kijeshi ya Khatam al-Anbiya nchini Iran ameonya kuwa iwapo Marekani itatekeleza vitisho vyake vya kushambulia miundombinu ya Iran, vikosi vya jeshi la Iran vitajibu kwa kushambulia miundombinu yote katika eneo la Mashariki ya Kati, akisisitiza kuwa Iran haitaruhusu kwa hali yoyote kuingiliwa katika Mlango wa Hormuz.

    Katika taarifa yake, msemaji huyo alisema Mlango wa Hormuz ni “mstari mwekundu usiovukwa” kwa Iran na kwamba hakuna mazingira ambayo Marekani, aliyoitaja kuwa nchi ya kigeni isiyo ya ukanda huo, itaruhusiwa kuingilia eneo hilo.

    “Tunasisitiza tena kwamba chini ya hali yoyote hatutaruhusu Marekani kuingilia Mlango wa Hormuz. Huu ni mstari mwekundu usiovunjika wa Jamhuri ya Kiislamu ya Iran,” alisema.

    Aidha, alionya kuwa endapo vitisho vya Rais wa Marekani vya kushambulia miundombinu ya Iran vitatekelezwa, vikosi vya jeshi la Iran vitajibu kwa nguvu dhidi ya miundombinu yote iliyosalia katika eneo hilo.

    “Ikiwa miundombinu ya Iran itashambuliwa, miundombinu yote katika eneo itakuwa chini ya mashambulizi makali ya vikosi vya Iran,” aliongeza.

    Msemaji huyo pia alisema Iran haitachukua hatua za kujihami kwa kiwango sawa na mashambulizi yoyote itakayokumbana nayo, bali itatoa kile alichokiita “jibu la kiwango cha juu zaidi” litakalokuwa kali, pana na lenye uharibifu mkubwa zaidi.

    Kauli hiyo imeongeza mvutano katika eneo la Mashariki ya Kati huku kukiwa na hofu ya kuongezeka kwa mzozo kati ya Iran na Marekani. Wadau wa kimataifa wanaendelea kufuatilia kwa karibu iwapo kutakuwa na hatua za kidiplomasia za kupunguza mvutano au iwapo pande husika zitaendelea kubadilishana vitisho vinavyoweza kuhatarisha usalama wa kanda.

  • Serikali: Uchunguzi wa Kutoweka kwa Humphrey Polepole Bado Unaendelea

    Serikali: Uchunguzi wa Kutoweka kwa Humphrey Polepole Bado Unaendelea

    DAR ES SALAAM, Julai 16 – Waziri wa Mambo ya Ndani ya Nchi, Patrobas Katambi, amesema Serikali inaendelea na uchunguzi kuhusu kutoweka kwa mwanasiasa Humphrey Polepole, huku akisisitiza kuwa uchunguzi wa aina hiyo unahitaji muda ili kuhakikisha ukweli unabainika na haki inatendeka kwa wote.

    Kauli ya Katambi imekuja ikiwa ni siku 274 tangu Polepole aripotiwe kutoweka alfajiri ya Jumatatu, Oktoba 16, 2025, akiwa katika makazi yake ya Ununio, Wilaya ya Kinondoni, jijini Dar es Salaam.

    Akizungumza katika mahojiano maalum na AyoTV, Katambi alisema matukio mengi yanayodaiwa kuwa ya utekaji yamekuwa yakihusishwa na Serikali, lakini baadaye uchunguzi umeonyesha baadhi yake yalitokana na migogoro binafsi kati ya raia.

    “Kulikuwa na matukio ambayo watu walidai Serikali imehusika, lakini baadaye ikabainika si kweli. Serikali haiteki watu; Serikali inawakamata kwa mujibu wa sheria na kuwafikisha kwenye vyombo vya sheria,” alisema.

    Aidha, alibainisha kuwa hata pale ambapo baadhi ya watumishi wa Serikali au askari wamehusika kufanya makosa kwa kutumia mamlaka yao vibaya, hatua za kisheria zimekuwa zikichukuliwa dhidi yao.

    “Sisemi kwamba natetea Serikali. Wapo askari ambao wamebainika kufanya makosa na wamechukuliwa hatua. Lakini hilo halimaanishi kwamba Serikali ndiyo inayotekeleza vitendo hivyo,” aliongeza.

    Akizungumzia suala la Polepole, Katambi alisema taarifa ya mwisho iliyotolewa na vyombo vya ulinzi na usalama ni kwamba uchunguzi na upelelezi bado unaendelea. Alieleza kuwa kumekuwa na taarifa zinazokinzana kuhusu mahali alikokuwa Polepole baada ya kutoweka, jambo linalohitaji uchunguzi wa kina.

    “Kulikuwa na taarifa zikisema inasadikika hakuwepo nchini, lakini pia zipo taarifa zinazosema alikuwa nchini. Kama ni kweli au si kweli, upelelezi unaendelea,” alisema.

    Kauli ya Waziri inamaanisha kuwa hadi sasa hakuna hitimisho rasmi kuhusu mazingira ya kutoweka kwa Humphrey Polepole. Serikali imeeleza kuwa uchunguzi utaendelea hadi ukweli utakapobainika na taarifa rasmi kutolewa kwa umma.

  • Ol Kalou: Vita ya kisiasa ‘mlima Kenya’ yaanza kuonyesha sura kabla 2027

    Ol Kalou: Vita ya kisiasa ‘mlima Kenya’ yaanza kuonyesha sura kabla 2027

    Kura za Ol Kalou leo zinaweza kuwa zaidi ya uchaguzi mdogo wa ubunge — zinaweza kuwa kipimo cha kwanza cha nguvu kati ya Rais William Ruto na aliyekuwa Naibu Rais Rigathi Gachagua katika kuwania ushawishi wa Mlima Kenya.
    Eneo hilo lina historia ya kisiasa kwa UDA, baada ya chama hicho kupata ushindi wake wa kwanza katika uchaguzi mdogo wa Rurii mwaka 2021 na baadaye kutawala sehemu kubwa ya Mlima Kenya kwenye uchaguzi wa 2022.
    Lakini sasa hali imebadilika. Baada ya kuondolewa kwa Gachagua madarakani Oktoba 2024, Ol Kalou imegeuka kuwa uwanja wa mapambano kati ya UDA ya Ruto na chama cha DCP kinachoongozwa na washirika wa Gachagua.
    DCP inaiona kura hiyo kama nafasi ya kuthibitisha kuwa UDA imepoteza ushawishi Mlima Kenya, huku UDA ikisisitiza kuwa uchaguzi huo utapima ikiwa wananchi wanapendelea maendeleo au siasa za upinzani.
    Wagombea tisa wanawania kiti hicho, akiwemo Sammy Ngotho wa DCP na Samuel Muchina wa UDA, huku vyama vingine kama Jubilee, PNU na Federal Party of Kenya vikiwasilisha wagombea.
    Kwa DCP, ushindi utakuwa ujumbe kwamba Gachagua bado ana ushawishi mkubwa katika eneo hilo na chama hicho kinaweza kuwa nguvu mpya kuelekea uchaguzi wa 2027.
    Kwa UDA, ushindi utaonyesha kuwa Rais Ruto bado ana nafasi katika ngome ya zamani ya kisiasa ya Mlima Kenya na kupunguza madai kwamba eneo hilo limemgeukia baada ya mgogoro na Gachagua.
    Hata hivyo, kura za maoni za Infotrak zinaonyesha ushindani mkali: DCP inaongoza kwa asilimia 33 ya uungwaji mkono Mlima Kenya, UDA ikiwa na asilimia 9, huku asilimia 36 ya wapigakura wakiwa bado hawajaamua.
    Matokeo ya Ol Kalou sasa yanaangaliwa kama ishara ya kwanza ya mwelekeo wa siasa za Mlima Kenya kuelekea 2027 — nani atakuwa na ushawishi mkubwa, Ruto au Gachagua?

  • Mashambulizi ya Anga Yalenga Uwanja wa Ndege wa Semnan; Hakuna Vifo Vilivyoripotiwa

    Mashambulizi ya Anga Yalenga Uwanja wa Ndege wa Semnan; Hakuna Vifo Vilivyoripotiwa

    Uwanja wa Ndege wa Semnan nchini Iran umelengwa na shambulio la anga lililotokea alfajiri ya leo, lakini mamlaka zimesema tukio hilo halikusababisha vifo wala majeruhi.


    Mkurugenzi Mkuu wa Masuala ya Usalama na Utawala wa Mkoa wa Semnan amesema kuwa ghala moja la pembeni katika eneo la uwanja wa ndege ndilo lililopigwa wakati wa shambulio hilo. Aidha, sehemu ya vioo vya jengo la uwanja wa ndege ilivunjika kutokana na athari za mlipuko.


    Mamlaka za mkoa zimeeleza kuwa tathmini ya kiwango cha uharibifu inaendelea, huku zikithibitisha kuwa hakuna madhara ya kibinadamu yaliyoripotiwa kufuatia tukio hilo.