Utaridi 2.0 Staging

Kategoria: KIMATAIFA

  • “Bila mimi, Israel haitakuwepo” – rais Trump apiga mkwara mzito, akosoa mashambulizi ya Beirut

    “Bila mimi, Israel haitakuwepo” – rais Trump apiga mkwara mzito, akosoa mashambulizi ya Beirut

    WASHINGTON, MAREKANI

    Rais wa Marekani, Donald Trump, amedai kuwepo kwa taifa la Israel kunategemea mchango wake binafsi, huku akionyesha kutoridhishwa na namna nchi hiyo inavyoendesha operesheni zake za kijeshi nchini Lebanon.

    Katika mfululizo wa matamshi yake ya hivi karibuni, Rais Trump amesisitiza kuwa bila jitihada na ulinzi wake, taifa la Israel lisingekuwa na uwezo wa kuendelea kuwepo duniani. “Bila mimi, hakutakuwa na Israel,” alikaririwa kiongozi huyo.

    Aidha, Rais Trump amefichua kuwa amewasilisha ujumbe kwa serikali ya Israel akieleza kuwa haungi mkono mashambulizi yanayofanywa na jeshi la nchi hiyo katika mji wa Beirut, Lebanon. Trump amebainisha kuwa amechukizwa na namna Israel inavyoshughulikia mgogoro wa Lebanon, akisema kuwa hali hiyo hairidhishi.

    Katika kile kinachoonekana kama shinikizo la wazi kwa uongozi wa Israel, Rais Trump amemtaka Waziri Mkuu Benjamin Netanyahu kuongeza umakini na kuwa na uwajibikaji mkubwa zaidi kuhusiana na hatua zinazochukuliwa dhidi ya Lebanon.

    “Sijafurahishwa na jinsi Israel inavyoshughulika na Lebanon. Netanyahu lazima sasa awe na uwajibikaji zaidi,” aliongeza Rais Trump.

    Kauli hizi za Rais Trump zinakuja wakati ambapo hali ya usalama Mashariki ya Kati ikiendelea kuwa tete, huku kiongozi huyo akisisitiza msimamo wake juu ya hatma ya kanda hiyo na ushirika kati ya Marekani na Israel.

  • Uingereza kufadhili Nishati ya Nyuklia Ukraine: Mkakati wa Pauni Milioni 210 Wafikiwa G7

    Uingereza kufadhili Nishati ya Nyuklia Ukraine: Mkakati wa Pauni Milioni 210 Wafikiwa G7

    Waziri Mkuu wa Uingereza, Keir Starmer, ametoa ahadi nzito katika mkutano wa kilele wa G7 kwa kuweka bayana mkakati mpya wa kuimarisha usalama wa nishati nchini Ukraine.

    Katika hatua inayolenga kudumisha utulivu wa umeme na viwanda nchini humo, Uingereza imekubaliana kuipatia Ukraine urani iliyoboreshwa (enriched uranium) kwa ajili ya matumizi katika mitambo ya nyuklia hadi mwaka 2028. Mpango huu, unaoungwa mkono na ufadhili wa pauni milioni 210 kutoka kwa serikali ya Uingereza, unalenga kuipa Ukraine uhakika wa nishati katika kipindi hiki kigumu.

    Hatua hii inatazamwa kama nguzo muhimu ya ushirikiano wa kimataifa, ikiiwezesha Ukraine kujimudu kiuchumi na kupunguza utegemezi wa rasilimali za nje wakati huu wa changamoto za kiusalama.

  • Lukashenko aiwashia moto Israel: “Hakuna tukio la kihistoria linalohalalisha mauaji ya watoto Gaza”

    Lukashenko aiwashia moto Israel: “Hakuna tukio la kihistoria linalohalalisha mauaji ya watoto Gaza”

    MINSK, BELARUS

    Rais wa Belarus, Alexander Lukashenko, ametoa tamko zito na la kulaani vikali hatua za kijeshi zinazochukuliwa na Israel katika Ukanda wa Gaza, akihoji uhalali wa mashambulizi hayo dhidi ya raia wasio na hatia.

    Katika kile kinachoonekana kama ukosoaji mkali zaidi kutoka kwake tangu kuanza kwa mzozo huo, Rais Lukashenko ameitaka serikali ya Israel kurejea katika hali ya kawaida na kutafakari upya mustakabali wake.

    Hoja Kuhusu Mauaji na Historia
    Akizungumzia kadhia hiyo, Lukashenko amepuuzia hoja ya kutumia historia ya ‘Holocaust’ (maangamizi makuu ya Wayahudi) kama ngao ya kutekeleza mauaji ya sasa.

    “Ni tukio gani la Holocaust ambalo Waisrael wanalizungumzia, linaloweza kuhalalisha mauaji ya watu wengi kiasi hiki, hasa wanawake na watoto?” alihoji Lukashenko kwa mshangao.

    Aliongeza kuwa idadi kubwa ya watoto wamepoteza maisha Gaza na kwamba jeshi la Israel limefuta kila kitu katika uso wa dunia ndani ya eneo hilo.

    Upumbavu Mtupu
    Rais huyo pia amekemea vikali kile alichokiita kuwa ni mipango ya “ajabu” inayodaiwa kupangwa na baadhi ya watu nchini Israel. Lukashenko ameshutumu taarifa za kuwepo kwa nia ya kujenga maeneo ya mapumziko na starehe (resorts) juu ya maeneo yaliyoharibiwa ambayo bado yana miili ya watu.

    “Sasa wanazungumzia kujenga aina fulani ya maeneo ya starehe juu ya mifupa ya wafu. Huo ni upumbavu mtupu,” alisema Rais Lukashenko.

    Onyo kwa Israel
    Katika hitimisho la kauli yake, kiongozi huyo wa Belarus ametoa onyo akisema kuwa ni wakati muafaka kwa Israel kuzinduka na kutathmini kwa kina namna mataifa mengine yanavyoichukulia na jinsi itakavyoweza kuendelea kuwepo hapo baadaye.

    “Israel inahitaji kurejea katika fahamu zake na kutafakari juu ya kuwepo kwake hapo baadaye,” alisisitiza kiongozi huyo.

    Kauli hii ya Lukashenko inakuja wakati shinikizo la kimataifa likizidi kuongezeka dhidi ya Israel kutokana na hali mbaya ya kibinadamu inayoshuhudiwa katika Ukanda wa Gaza.

  • “B- 52 mwavuli wa nyuklia” : Ndege ya mashambulizi ya masafa marefu ya Marekani yaanguka

    “B- 52 mwavuli wa nyuklia” : Ndege ya mashambulizi ya masafa marefu ya Marekani yaanguka

    CALIFORNIA, MAREKANI

    Jeshi la Anga la Marekani limepata pigo kubwa baada ya moja ya ndege zake muhimu na zenye nguvu zaidi, aina ya B-52 Stratofortress, kuanguka muda mfupi baada ya kupaa katika jimbo la California.

    Ndege hiyo, ambayo inachukuliwa kuwa uti wa mgongo wa mashambulizi ya masafa marefu ya Marekani, inaripotiwa kuwa miongoni mwa zana zilizokuwa zikishiriki katika operesheni za kijeshi nchini Iran wakati huu wa mivutano ya kivita kati ya Marekani, Israel, na Iran.

    Uwezo wa Kutisha wa B-52

    Ndege ya B-52 ni kielelezo cha nguvu ya kijeshi ya Marekani. Ina uwezo wa kupaa hadi kimo cha futi 50,000—juu zaidi ya ndege za abiria ambazo hupaa kimo cha futi 35,000. Aidha, ndege hii ina uwezo wa kubeba shehena ya silaha yenye uzito wa ratili (lbs) 70,000, ikijumuisha mamia ya mabomu ya kawaida na makombora 32 ya nyuklia (nuclear cruise missiles).

    Sifa ya kipekee ya B-52 ni uwezo wake wa kuongezewa mafuta ikiwa angani, jambo linaloifanya kuwa na uwezo wa kushambulia mahali popote duniani bila kuhitaji kutua. Wakati wa enzi za Vita Baridi, ndege hii ilitumika kama “mwavuli wa nyuklia” wa Marekani chini ya sera ya maangamizi ya pande zote (Mutually Assured Destruction)

  • Obama “Vita vya Trump dhidi ya Iran vimefeli, hakuna njia mbadala isipokuwa suluhisho la kidiplomasia

    Obama “Vita vya Trump dhidi ya Iran vimefeli, hakuna njia mbadala isipokuwa suluhisho la kidiplomasia

    WASHINGTON, MAREKANI

    Aliyekuwa Rais wa Marekani, Barack Obama, ametoa kauli nzito akikosoa vikali sera za Donald Trump, kuhusiana na mzozo kati ya Marekani na Iran. Katika kile kinachoonekana kama tathmini ya kina, Obama amesema kuwa mbinu za mabavu na mashambulizi ya kijeshi zimeshindwa kuleta matokeo yoyote ya maana.

    Obama amesisitiza kuwa Marekani “haikupata chochote” kupitia sera za vitisho na mashambulizi ya mabomu, na badala yake, hatua bora inayoweza kufikiwa kwa sasa ni kurejea katika makubaliano ya awali ya nyuklia. Ameweka wazi kuwa makubaliano yoyote yatakayofikiwa huko mbeleni hayawezi kuwa bora kuliko lile la JCPOA, ambalo Marekani ilijiondoa kwa kile alichokiita “uamuzi wa kijinga,” licha ya makubaliano hayo kufanya kazi kwa ufanisi kwa miaka mingi.

    “Ninatumaini mashambulizi haya yasiyo na tija yatakoma haraka iwezekanavyo,” alisema Obama, huku akiongeza kuwa ni raia wa kawaida ndio wanaozidi kulipa gharama ya mateso kutokana na vita hivyo alivyoviita “vita vya hiari.”

    Aidha, kiongozi huyo wa zamani ametoa onyo kwa wale wanaoamini kuwa suluhu inaweza kupatikana kwa kuitishia au kuipiga bomu nchi nyingine. Obama ameyataja mawazo hayo kuwa ni “ndoto ya mchana na udanganyifu” unaotumiwa na watu wenye msimamo mkali, lakini kiuhalisia hayana nafasi katika utatuzi wa migogoro ya kimataifa.

    Akihitimisha hoja yake, Obama ametoa wito wa kupewa kipaumbele kwa diplomasia. Amesema kuwa ukweli uliopo unathibitisha kuwa makubaliano ya kisiasa—hata kama yatatatua asilimia 80 hadi 90 tu ya matatizo—ni bora mara maelfu kuliko kuitumbukiza dunia katika vita vya maangamizi visivyo na mwelekeo wala tija.

  • Ulaya Yasema Ipo Tayari Kuondoa Vikwazo kwa Iran Ikiwa Itachukua Hatua za Nyuklia

    Ulaya Yasema Ipo Tayari Kuondoa Vikwazo kwa Iran Ikiwa Itachukua Hatua za Nyuklia

    Uingereza, Ufaransa, Ujerumani na Italia zimetangaza kuwa ziko tayari kuondoa baadhi ya vikwazo vinavyohusiana na Iran iwapo Tehran itachukua hatua zilizo wazi na zinazoweza kuthibitishwa kuhusu mpango wake wa nyuklia. Hayo yameelezwa katika taarifa ya pamoja iliyotolewa na nchi hizo nne.

    Katika taarifa hiyo, mataifa hayo yamesisitiza kuwa Iran haipaswi kamwe kupata silaha za nyuklia. Pia yameeleza utayari wao wa kushirikiana na Marekani, Iran pamoja na Shirika la Kimataifa la Nishati ya Atomiki (IAEA) ili kuhakikisha lengo hilo linafikiwa.