Utaridi 2.0 Staging

Kategoria: MASHARIKI YA KATI

  • Jeshi la Israel Lakiri Kuelemewa na Droni za Mashambulizi

    Jeshi la Israel Lakiri Kuelemewa na Droni za Mashambulizi

    TEL AVIV – Kituo cha televisheni cha Channel 12 cha Israel kimeripoti kuwa jeshi la nchi hiyo limekiri kuwepo kwa hitilafu katika mfumo wake wa kutoa onyo dhidi ya droni za mashambulizi (FPV) zinazotumiwa na makundi ya Muqawama.

    Wakati huo huo, gazeti la Haaretz la Israel limeripoti kuwa jeshi hilo limeelezea wasiwasi mkubwa kuhusu tishio la droni hizo zilizosheheni vilipuzi, huku likikiri wazi kuwa halina uwezo madhubuti wa kiutendaji wa kukabiliana nazo.

    Chanzo kimoja cha kijeshi kimeliambia gazeti la Haaretz kuwa: “Hili ni tukio ambalo limetushtukiza na kiukweli hatukuwa tumejipanga.” Chanzo hicho kimebainisha kuwepo kwa ongezeko la shinikizo kwa jeshi hilo, linalotoka kwa makamanda, wanajeshi walioko mstari wa mbele, pamoja na familia zao.

    Gazeti hilo limefafanua zaidi kuwa, licha ya kuwepo kwa operesheni za ardhini zilizopanuliwa katika maeneo ya kaskazini kwa lengo la kudhibiti urushwaji wa droni kuelekea kwenye makazi ya watu, jeshi lenyewe limekiri kuwa hatua hiyo bado haijafanikiwa kuzizuia ipasavyo.

    Badala yake, hatua ya wanajeshi wa Israel kusonga mbele zaidi imezidi kuwaweka hatarini na kuwafanya walengwe kwa urahisi na droni hizo zinazoongozwa kwa mfumo wa mawasiliano wa ‘fiber-optic’, ambazo imeelezwa kuwa ni vigumu sana kuzidungua au kuzizuia kimawasiliano (jamming).

  • Mfuko wa Trump wa Kujenga Upya Gaza Wasalia Mtupu Licha ya Ahadi ya Matrilioni

    Mfuko wa Trump wa Kujenga Upya Gaza Wasalia Mtupu Licha ya Ahadi ya Matrilioni

    WASHINGTON:
    Mfuko rasmi unaosimamiwa na Benki ya Dunia chini ya mpango wa Rais wa Marekani Donald Trump wa kuijenga upya Gaza unaojulikana kama “Bodi ya Amani” (Board of Peace), umeripotiwa kuwa na “dola sifuri” hadi sasa, licha ya kuwepo kwa ahadi za michango zinazofikia takriban dola bilioni 17.

    Kwa mujibu wa ripoti iliyochapishwa Mei 27 na gazeti la Financial Times (FT), mpango huo ambao ulitarajiwa kuwa juhudi za kimataifa za kuijenga upya Gaza iliyoharibiwa vibaya, umekwama kutokana na kasoro za kifedha, utata wa kisheria, na ukosefu wa maendeleo yoyote kwenye eneo la tukio.

    Msaidizi mwandamizi wa Bunge la Marekani aliiambia FT kuwa, hakuna kiasi chochote cha fedha hizo ambacho kimeingia au kusimamiwa na bodi hiyo. Badala ya kuwekwa kwenye mfuko rasmi ulioungwa mkono na Umoja wa Mataifa, bodi imeamuru michango ielekezwe kwenye akaunti binafsi ya benki ya JPMorgan. Hatua hii imeibua hofu kubwa miongoni mwa wabunge na waangalizi, kwani akaunti hiyo inakosa uwazi na masharti ya utoaji taarifa yaliyowekwa na Benki ya Dunia.

    Ripoti zinaeleza kuwa, kiasi kidogo cha fedha kilichotolewa hadi sasa—ikiwemo dola milioni 3 kutoka Morocco na dola milioni 20 kutoka Falme za Kiarabu (UAE)—kimetumika kulipa mishahara ya wafanyakazi, huku mafungu makubwa kwa ajili ya ulinzi na miundombinu yakiwa yamezuiliwa au hayajatumika.
    Katika hatua ya kushangaza, Marekani sasa inafikiria mpango wa kuchukua sehemu ya dola bilioni 5 za mapato ya kodi ya Mamlaka ya Ndani ya Palestina (PA) ambayo kwa sasa yanazuiliwa na Israel, ili kufadhili shughuli za bodi hiyo zinazosuasua. Mpango huu unalenga kuelekeza kodi hizo kwa mamlaka ya mpito inayoongozwa na Marekani huko Gaza, huku kiasi kinachosalia kikitarajiwa kutolewa kwa PA tu endapo itakubali kufanya mabadiliko maalum yanayoshinikizwa na Israel.

  • Iran Yashambulia Meli ya Mafuta ya Marekani Iliyozimwa Rada Hormuz.

    Iran Yashambulia Meli ya Mafuta ya Marekani Iliyozimwa Rada Hormuz.

    BANDAR ABBAS, IRAN — Chanzo cha kuaminika cha kijeshi kimeiambia Wakala wa Habari wa Tasnim kuwa, usiku wa kuamkia Alhamisi, meli moja ya mafuta ya Marekani ilijaribu kupita kwa siri katika Mlango wa Hormuz baada ya kuzima mifumo yake ya rada.

    Hata hivyo, kufuatia hatua ya haraka na madhubuti ya Kikosi cha Wanamaji cha Walinda Mapinduzi ya Kiislamu ya Iran (IRGC), ikiwemo kufyatua risasi za tahadhari kuelekea meli hiyo, chombo hicho kililazimika kusitisha safari yake na kurejea kilikotoka.

    Kwa mujibu wa taarifa hiyo, katika kujibu tukio hilo, jeshi la Marekani lilifyatua mashambulizi kuelekea eneo la ardhi tupu lililoko karibu na Bandar Abbas. Sauti za milipuko zilizosikika katika maeneo ya karibu zinaripotiwa kuhusishwa na tukio hilo.

    Taarifa za awali zinaeleza kuwa mashambulizi hayo hayakusababisha vifo, majeruhi wala uharibifu wa mali.

  • Iran: Hakuna Mazungumzo Mapya na Marekani Hadi Fedha Zilizozuiwa Zirejeshwe

    Iran: Hakuna Mazungumzo Mapya na Marekani Hadi Fedha Zilizozuiwa Zirejeshwe

    Shirika la Habari la Fars, likinukuu chanzo cha uhakika, limeripoti kuwa hakutakuwa na mazungumzo yoyote kati ya Iran na Marekani bila kufanyika kwa uhamishaji wa fedha za Iran zilizozuiwa. Kwa mujibu wa ripoti hiyo, mzozo mkubwa wa hivi punde kati ya mataifa haya mawili kuelekea kuanza kwa mazungumzo, unahusu utaratibu wa kuiwezesha Iran kufikia mali zake hizo.

    Kwa mujibu wa chanzo hicho, suala la fedha za Iran zinazoshikiliwa linashughulikiwa kupitia juhudi za upatanishi zinazoongozwa na nchi ya Qatar. Imeelezwa pia kuwa hapo awali, Marekani ilikiuka ahadi zake kuhusiana na urejeshwaji wa mali hizo za Iran.

    Chanzo hicho kimeiambia Fars kuwa Iran imeshikilia msimamo wake thabiti, ikisisitiza kwamba maadamu fedha hizo zilizokubaliwa hazijahamishwa, hakuna makubaliano yoyote yanayoweza kufikiwa baina yao.

    Hata hivyo, mashauriano yanayoendelea nchini Qatar yameripotiwa kupiga hatua nzuri kuelekea kutatua kikwazo hicho.

    Licha ya hatua hiyo, chanzo hicho kimebainisha kuwa jopo la wapatanishi la Iran halichukulii maelewano hayo ya awali kama uamuzi wa mwisho, hasa kutokana na rekodi ya Marekani ya kukiuka makubaliano huko nyuma. Kimeongeza kuwa Iran imethibitisha kuwa iko tayari kwa hatua na chaguzi zote zinazoweza kujitokeza.

  • Jarida la The New Yorker: Makubaliano Yoyote na Iran, Yatakuwa Fedheha kwa Trump.

    Jarida la The New Yorker: Makubaliano Yoyote na Iran, Yatakuwa Fedheha kwa Trump.

    WASHINGTON – Jarida la Marekani la The New Yorker limeripoti kuwa makubaliano yoyote yatakayofikiwa na Donald Trump kwa ajili ya kumaliza mzozo na Iran yatakuwa ya fedheha kwake, kutokana na mazingira magumu aliyoyatengeneza yeye mwenyewe.

    Kwa mujibu wa uchambuzi wa chombo hicho cha habari, vita dhidi ya Iran vimegeuka na kuwa “kushindwa kimkakati” kwa upande wa Marekani, huku serikali ya Iran kwa sasa ikijikuta katika nafasi yenye nguvu zaidi kuliko ilivyokuwa hapo awali.

    Ripoti hiyo inaeleza kuwa katika hali ya sasa, Trump amelazimika kufanya maamuzi kati ya chaguo “baya” na “baya zaidi,” na inaonekana wazi kuwa ameelekea kwenye chaguo ambalo ni “baya sana.” Inadaiwa kuwa chini ya mfumo wa makubaliano hayo yaliyopendekezwa, Iran haitapata tu fedha taslimu, bali pia itanufaika na kuondolewa kwa vikwazo vya kiuchumi.

    Jarida hilo linahitimisha kwa mtazamo kuwa, vita vilivyoanzishwa kwa lengo la kuiangusha serikali ya Iran, katika uhalisia wake, vimeishia kuipa nguvu na kuiimarisha serikali hiyo zaidi.

  • Marekani Yathibitisha Kufanya Mashambulizi Kusini mwa Iran, Yakana Kukiuka Usitishaji wa Vita.

    Marekani Yathibitisha Kufanya Mashambulizi Kusini mwa Iran, Yakana Kukiuka Usitishaji wa Vita.

    Makubaliano ya kusitisha mapigano yameripotiwa kukiukwa na Marekani kufuatia uthibitisho kutoka kwa vikosi vyake kuhusu kutekeleza mashambulizi katika maeneo ya kusini mwa Iran.

    Kwa mujibu wa shirika la habari la Fox News, likinukuu taarifa kutoka Kamandi Kuu ya Marekani (CENTCOM), mashambulizi hayo yalilenga maalum vituo vya kurushia makombora pamoja na boti zilizokuwa zikijaribu kutega mabomu (mina) baharini.

    Akithibitisha kutokea kwa tukio hilo, Msemaji wa Kamandi Kuu ya Marekani ameeleza kuwa vikosi vyao vilitekeleza mashambulizi hayo siku ya Jumatatu kusini mwa Iran. Hata hivyo, msemaji huyo ametetea hatua hiyo akidai kuwa ilichukuliwa kwa lengo la kujilinda dhidi ya vitisho vya kiusalama.