Utaridi 2.0 Staging

Blog

  • Iran YAKATAA MABAVU ya Trump, Hatujafikia mapatano yoyote na Marekani

    Iran YAKATAA MABAVU ya Trump, Hatujafikia mapatano yoyote na Marekani

    Msemaji wa Wizara ya Mambo ya Nje ya Iran amesema Ijumaa kwamba mabadilishano ya ujumbe kati ya Iran na yanaendelea, lakini hadi sasa hakuna mwafaka wa mwisho uliofikiwa huku akisisitiza kuwa Tehran haikubali lugha ya mabavu.

    Esmaeil Baghaei amesema katika mahojiano na televisheni ya taifa ya Iran kwamba: “Tuliagana na lugha ya mabavu miaka 47 iliyopita.” Ameongeza kusema: “Hakuna dola lolote la Magharibi linaloweza kutumia lugha ya ‘kulazimisha’ katika mazungumzo na Jamhuri ya Kiislamu ya Iran. Tunafanya maamuzi yetu wenyewe kwa kuzingatia maslahi na haki za taifa la Iran.”

    Kauli zake zilikuja saa chache baada ya Rais wa Marekani Donald Trump kudai kwenye mtandao wa kijamii wa Truth Social kwamba lazima usimamizi wa Iran katika Mlango wa Hormuz uondolewa. Pia alidai kwamba uamuzi kuhusu makubaliano na Iran utachukuliwa hivi karibuni.

    Iran ilifunga Mlango wa Hormuz kwa maadui zake na washirika wao baada ya kuanza vita vya kichokozi vya Marekani na Israel dhidi yake tarehe 28 Februari na kuendelea kwa siku 40. Mamlaka za Iran zilianza kutekeleza udhibiti mkali zaidi mwezi uliopita kufuatia tangazo la Trump kuhusu kutekelezwa mzingiro uliolenga meli na bandari za Iran.

    Iran imesema hatua hizo za Trump zinakiuka masharti ya usitishaji mapigano na kwamba baadaye ziliongezwa kwa upande mmoja na Washington.

    Mazungumzo yasiyo ya moja kwa moja kati ya Iran na Marekani, yanayosimamiwa na Pakistan na kuratibiwa na Qatar, yanaendelea kwa msingi wa pendekezo la vipengele 14 la Jamhuri ya Kiislamu. Lengo lake ni kufikiwa kwa hati ya makubaliano ya kumaliza vita vya Marekani na Israel dhidi ya Iran, kusitishwa uhasama wa Marekani baharini, na  kuachiliwa kwa mali za Iran zilizozuiwa.

    Baghaei amesisitiza kwamba Mlango wa Hormuz uko ndani ya maji ya kieneo ya Iran na Oman na hivyo ni nchi hizo mbili jirani zitakzoamua kuhusu usimamizi wa eneo hilo.

  • Kauli ya Marekani Baada ya Kenya Kusitisha Ujenzi wa Kituo cha Ebola nchini humo

    Kauli ya Marekani Baada ya Kenya Kusitisha Ujenzi wa Kituo cha Ebola nchini humo

    Mahakama Kuu ya Kenya imesitisha kwa muda kuanzishwa kituo cha karantini kwa wagonjwa wa Ebola raia wa Marekani, kilichotarajiwa kujengwa nchini humo. Kufuatia uamuzi huo, wakuu wa Marekani wamedai kuwa  watashughulikia hofu ya Wakenya kuhusiana na kituo hicho.

    Taarifa ya Jumamosi kutoka Ofisi ya Jeremy P. Lewin, Naibu Waziri wa Mambo ya Nje wa Marekani anayeshughulikia Misaada wa Kigeni, imesema: “Tumejulishwa kuhusu hatua ya mahakama nchini Kenya dhidi ya kituo cha kutenga wagonjwa wa Ebola. Tunawasiliana na mamlaka za Kenya na tuna matumaini kuwa tunaweza kutatua pingamizi hiyo.”

    Taarifa hiyo ni majibu ya kwanza ya hadharani kutoka Washington tangu Mahakama Kuu ya Kenya isimamishe mpango wa kuanzisha au kuanza kufanya kazi kituo hicho, hadi pale shauri la kikatiba litakaposikilizwa na kuamuliwa.

    Jaji Patricia Nyaundi alitoa maagizo hayo Ijumaa baada ya kundi la kutetea haki kupinga mradi huo, likisema kuwa unazua masuala ya kikatiba na ya maslahi ya umma yanayohitaji mapitio ya kimahakama.

    Kituo hicho kilichopendekezwa kimeibua mjadala mkali nchini Kenya, kufuatia taarifa kwamba kitatumika kuwashguhulikia raia wa Marekani wanaoweza kuwa wameathiriwa na Ebola wakati wa mlipuko unaoendelea katika Jamhuri ya Kidemokrasia ya Congo. Kauli ya Waziri wa Mambo ya Nje wa Marekani, Marco Rubio, kuwa Marekani haitawaruhusu kuingia nchini humo waathirika au washukiwa wa ugonjwa wa Ebola na kwamba watatibiwa katika nchi nyingine imewakasirisha sana Wakenya wanaoona kwamba nchi yao inatumiwa kama jaa la taka na Marekani.

    Wizara ya Afya ya Kenya imeutetea mpango wa kujenga kituo hicho na kusema ni sehemu ya ushirikiano wa kimataifa kuhusu kukabiliana na magonjwa kwa kuzingatia kanuni zote la afya.

    Muungano wa Madaktari Kenya (KMPDU) umeitaka serikali iwe na uwazi kamili kuhusu makubaliano yoyote yanayohusiana na kituo hicho kilichopendekezwa, ukisema masuala ya afya ya umma na usalama yanapaswa kujadiliwa wazi kabla ya mpango wowote kama huo kusonga mbele.

  • Liverpool Yamtimua Kocha Arne Slot.

    Liverpool Yamtimua Kocha Arne Slot.

    Liverpool, Uingereza — Klabu ya Liverpool imethibitisha rasmi kuondoka kwa meneja wake, Arne Slot, kufuatia msimu wa 2025/26 uliomalizika bila kufikia matarajio ya klabu na mashabiki.

    Slot, raia wa Uholanzi, alikumbana na changamoto katika msimu wake wa pili akiwa Anfield, ambapo matokeo ya timu yalishuka na Liverpool kumaliza ligi katika nafasi ya tano, tofauti na mafanikio ya awali ya kutwaa taji la Ligi Kuu ya England (Premier League).

    Katika taarifa yake, Liverpool ilieleza kuwa uamuzi wa kuachana na Slot haukuwa mwepesi. Klabu ilisisitiza kuwa mchango wa kocha huyo katika kipindi alichokuwepo umekuwa “mkubwa na wenye maana,” ikiutaja kuwa umeleta mafanikio kwa ujumla, sambamba na maadili ya kazi, bidii na kiwango cha utaalamu.

    “Kuanzia mara ya kwanza tulipokutana naye, ilikuwa wazi kuwa ni mtu anayekubali na kukumbatia wajibu,” ilieleza sehemu ya taarifa hiyo, ikitaja uongozi wake wakati wa kipindi cha mafanikio na pia katika msimu uliopita alipokabiliwa na changamoto nyingi.

    Liverpool iliongeza kuwa baada ya tathmini ya pamoja, klabu imefikia hitimisho kwamba mabadiliko ni muhimu ili kuendeleza maendeleo na kuhakikisha timu inaendelea kusonga mbele, ikisisitiza tena kuwa uamuzi huo ulifikiwa baada ya tafakari ya kina.

    Klabu haikutangaza mara moja mrithi wa Slot, na taarifa zaidi kuhusu mipango ya benchi la ufundi zinatarajiwa kutolewa baadaye.

  • Muungano wa Madaktari Kenya waipa serikali masaa 48, Hatutaki Ebola Kenya

    Muungano wa Madaktari Kenya waipa serikali masaa 48, Hatutaki Ebola Kenya

    Muungano wa Madaktari, Wafamasia na Madaktari wa Meno nchini Kenya (KMPDU) umepatia serikali muda wa saa 48 kueleza hadharani masharti kamili ya makubaliano yake na Marekani au ikabiliwe na mgomo wa kitaifa wa madaktari.

    Ni baada ya kutangazwa kwamba, wataalamu wa magonjwa ya kuambukiza kutoka Marekani wamewasili nchini Kenya na tayari wanaendelea na maandalizi ya kituo maalumu cha Ebola ambacho Waziri wa Mashauri ya Kigeni wa Marekani, Marco Rubio, amesema kitaanza kufanya kazi ndani ya siku saba zijazo.

    Kwa mujibu wa vyanzo, kituo hicho kinajengwa karibu na maeneo ya kijeshi ya Uingereza katika Kaunti ya Laikipia.

    Lengo lake limetajwa kuwa ni kwa ajili ya kuwatenga raia wa Marekani walioathiriwa au waliokaribiana na virusi vya Ebola.

    Katibu Mkuu wa KMPDU, Dkt Davji Bhimji Atellah, amesema kituo hicho kinaanzishwa katika Kituo cha Anga cha Laikipia.

    “Kenya ni taifa huru, si eneo la kutengwa wagonjwa wa magonjwa hatari kwa maslahi ya kisiasa,” amesema Dkt Atellah.

    “Hatutakubali Kenya kutumiwa kama mahali pa kuhifadhi wagonjwa wa virusi hatari ambavyo havikutoka nchi yetu.”

    Muungano huo umeitaka serikali kueleza kwa nini Kenya imechaguliwa kupokea raia wa Marekani walio na Ebola ilhali mataifa jirani na maeneo yaliyoathirika zaidi hayajapewa jukumu hilo.

    “Ikiwa Amerika inaamini safari ya saa 12 ya kuwarudisha raia wake Washington ni hatari sana, kwa mantiki gani ni salama kuwaleta Kenya?” alihoji Dkt Atellah.

    Muungano huo pia umesema hautakubali mfumo wa afya wa kibaguzi nchini Kenya.KMPDU imesema haitakubali madaktari wa Kenya kutumiwa kama wafanyakazi wa bei rahisi katika mazingira hatari bila mishahara bora, marupurupu ya kazi hatari na bima kamili ya afya.

    Wakati huo huo, Wizara ya Afya kupitia Katibu katika Idara ya Afya ya Umma Mary Muthoni ilisema Kenya ina uhuru wa kushirikiana na mataifa mengine katika kupambana na Ebola iliyosababisha zaidi ya vifo 100 nchini DRC.

  • Mkasa wa moto Utumishi Girls: Wanafunzi zaidi ya 10 wakamatwa huku uchunguzi ukishika kasi

    Mkasa wa moto Utumishi Girls: Wanafunzi zaidi ya 10 wakamatwa huku uchunguzi ukishika kasi

    KENYA– Jeshi la polisi limeanza kuwazuilia wanafunzi zaidi ya 10 wa Shule ya Wasichana ya Utumishi (Utumishi Girls Academy) kwa ajili ya mahojiano, kufuatia mkasa wa kusikitisha wa moto ulioteketeza bweni la shule hiyo na kugharimu maisha ya wanafunzi 16.

    Tukio hilo la kutisha lilitokea majira ya saa 12:45 usiku wa kuamkia Alhamisi, Mei 28, ambapo moto mkali uliibuka ghafla na kuteketeza ghorofa ya juu ya bweni hilo, huku wanafunzi wengi wakijikuta wamenaswa ndani ya jengo hilo lililokuwa likiwaka moto.

    Mbali na vifo hivyo, wanafunzi wengine 79 walipata majeraha mbalimbali kutokana na kisa hicho cha moto. Hata hivyo, taarifa za hivi punde kutoka kwa mamlaka za afya zinaashiria ahueni, ikibainisha kuwa wanafunzi 71 miongoni mwa waliojeruhiwa wameruhusiwa kutoka hospitalini baada ya hali zao kuimarika.

    Vyombo vya usalama vimeeleza kuwa kukamatwa kwa wanafunzi hao ni sehemu ya mikakati kabambe ya uchunguzi ili kubaini kiini halisi cha janga hilo lililoacha simanzi kubwa kwa jamii na familia za waathiriwa.

    Uchunguzi bado unaendelea huku shule hiyo ikiwa imefunikwa na wingu zito la majonzi, huku wazazi na wadau wa elimu wakisubiri ripoti kamili ya nini kilichosababisha moto huo ambao umebadilisha historia ya shule hiyo kwa namna ya kusikitisha.

  • Urusi na Taliban zasaini makubaliano ya ushirikiano wa kijeshi na kiteknolojia

    Urusi na Taliban zasaini makubaliano ya ushirikiano wa kijeshi na kiteknolojia

    MOSCOW, URUSI – Serikali ya Urusi na utawala wa Taliban nchini Afghanistan zimeingia katika ukurasa mpya wa mahusiano baada ya kutia saini makubaliano rasmi ya ushirikiano katika nyanja za kijeshi na kiteknolojia.

    Kwa mujibu wa shirika la habari la Urusi, Interfax, makubaliano hayo yaliafikiwa mnamo Mei 27 wakati wa “Jukwaa la Kimataifa la Usalama” lililofanyika jijini Moscow. Hatua hii inatazamwa kama mabadiliko makubwa ya kidiplomasia katika kanda hiyo.

    Mazungumzo ya Ngazi ya Juu
    Katika pambizoni mwa jukwaa hilo, Waziri wa Ulinzi wa Taliban, Mullah Mohammad Yaqoob, alifanya mazungumzo ya kina na Katibu wa Baraza la Usalama la Urusi, Sergei Shoigu. Katika mazungumzo hayo, Yaqoob alisisitiza umuhimu wa ushirikiano huo, akibainisha kuwa Afghanistan na Urusi zina historia ndefu na kwamba Taliban inakusudia kuimarisha zaidi vifungo hivyo kwa maslahi ya pande zote mbili.

    Kwa upande wake, Sergei Shoigu alitumia fursa hiyo kutoa wito kwa mataifa ya Magharibi kuachia mali za Afghanistan zilizozuiliwa (frozen assets). Shoigu alisisitiza kuwa nchi hizo za Magharibi zinapaswa kubeba dhima kamili ya kuijenga upya Afghanistan baada ya miongo kadhaa ya vita.

    Usalama wa Kikanda na Mustakabali wa Kijeshi
    Mfululizo wa mikutano hiyo uliendelea Mei 28, ambapo Naibu Waziri wa Ulinzi wa Urusi, Vasily Osmakov, alikutana na Yaqoob kwa mara nyingine. Mazungumzo yao yalijikita zaidi katika masuala ya usalama wa kikanda, hususan katika maeneo ya Asia ya Kati na Kusini.

    Wizara ya Ulinzi ya Urusi imeeleza kuwa viongozi hao walijadili pia mustakabali wa ushirikiano kati ya vikosi vya silaha vya nchi hizo mbili, ikiwemo nyanja mahususi za ushirikiano wa kijeshi ambazo zitafanyiwa kazi katika siku za usoni.

    Hatua hii ya Urusi inakuja wakati Moscow ikionekana kutaka kuimarisha ushawishi wake nchini Afghanistan, huku ikitaka kuhakikisha utulivu wa mipaka yake ya kusini dhidi ya vitisho vya kigaidi na biashara ya dawa za kulevya.