Utaridi 2.0 Staging

Blog

  • Mpangilio Mpya wa Kimataifa: Spika wa Iran Asema Mustakabali wa Dunia haipo tena Marekani

    Mpangilio Mpya wa Kimataifa: Spika wa Iran Asema Mustakabali wa Dunia haipo tena Marekani

    Spika wa Bunge la Iran, Baqir Ghalibaf, amesema dunia iko katika hatua ya kuingia katika mpangilio mpya wa kimataifa.

    Akinukuu kauli ya Rais wa China, Xi Jinping, Ghalibaf alisema kuwa “mabadiliko ambayo hayajaonekana katika kipindi cha karne moja yanaongezeka kasi duniani kote.”

    Alisisitiza kuwa ukakamavu wa siku 70 wa taifa la Iran dhidi ya uvamizi wa Marekani na Israel umechangia kuharakisha mabadiliko hayo. Ghalibaf pia alieleza kuwa mustakabali wa dunia unazidi kuelekea kwa nchi za Ulimwengu wa Kusini (Global South).

  • Ufaransa imefungua rasmi uchunguzi kuhusu mauaji ya mwanahabari Jamal khashoggi

    Ufaransa imefungua rasmi uchunguzi kuhusu mauaji ya mwanahabari Jamal khashoggi

    Ufaransa imeanzisha rasmi uchunguzi wa kisheria kuhusu mauaji ya mwaka 2018 ya mwanahabari Jamal Khashoggi, uchunguzi unaomlenga Mwanamfalme wa Saudi Arabia, Mohammed bin Salman.

    Kwa mujibu wa taarifa zilizotolewa, jaji kutoka kitengo cha uhalifu dhidi ya ubinadamu nchini Ufaransa ameteuliwa kusimamia uchunguzi huo.

    Hii ni mara ya kwanza kwa jaji wa Ufaransa kuteuliwa rasmi kuchunguza madai yanayohusisha nafasi inayodaiwa ya Mohammed bin Salman katika tukio hilo.Hadi sasa, Saudi Arabia haijatoa tamko lolote kuhusu maendeleo hayo.

  • China yaendelea kushikilia msimamo wake kuhusu Iran licha ya ziara ya Trump.

    China yaendelea kushikilia msimamo wake kuhusu Iran licha ya ziara ya Trump.

    Ripoti ya Al-Monitor inaeleza kuwa ziara ya Donald Trump nchini China haikuleta mafanikio yoyote ya maana katika suala la Iran. Kwa mujibu wa ripoti hiyo, China bado inaendelea kuwa mnunuzi mkubwa wa mafuta ya Iran, licha ya vikwazo vilivyowekwa na Marekani dhidi ya Tehran.

    Ripoti hiyo inaongeza kuwa, tofauti na Trump ambaye anakabiliwa na shinikizo la ndani nchini Marekani, Rais wa China Xi Jinping hana haraka ya kutafuta suluhisho la mgogoro wa Mlango wa Hormuz. Hali hiyo inatajwa kuchangiwa na sababu kadhaa, ikiwemo ushirikiano uliopo tayari kati ya China na Iran kuhusu eneo hilo.

    Aidha, mzozo huo unaonekana kuwa na manufaa kwa China kwa namna fulani, jambo linaloifanya Beijing kutokuwa na msukumo mkubwa wa kubadili msimamo wake. Vilevile, hata kama China ingekuwa tayari kushinikiza Iran kufikia makubaliano, hakuna uhakika kuwa Tehran ingekubali au kufuata masharti hayo.

  • Ulaya Yakabiliwa na Mgogoro wa Upungufu wa Dawa Baada ya Vita vya Iran.

    Ulaya Yakabiliwa na Mgogoro wa Upungufu wa Dawa Baada ya Vita vya Iran.

    Ripoti mpya iliyochapishwa na gazeti la La Tribune la Ufaransa imeonya kuhusu hatari ya upungufu wa dawa barani Ulaya, hali inayohusishwa na kuvurugika kwa mnyororo wa usambazaji wa sekta ya dawa duniani.

    Kwa mujibu wa taarifa hiyo, sekta ya dawa barani Ulaya inategemea kwa takribani asilimia 80 uzalishaji kutoka China na India. Hata hivyo, ongezeko la bei ya mafuta na gesi limeifanya sekta hiyo kukumbwa na changamoto kubwa za uzalishaji na usafirishaji.

    Aidha, kupungua kwa safari za ndege katika maeneo ya Mashariki ya Kati na Asia kumeelezwa kuwa moja ya sababu zinazochangia kucheleweshwa kwa usafirishaji wa malighafi na bidhaa za dawa kwenda Ulaya.

    Kampuni ya bima ya biashara ya kimataifa, Coface, imeonya kuwa dawa kama asetaminofeni pamoja na aina kadhaa za antibiotiki ziko katika hatari kubwa ya upungufu. Ripoti hiyo inaeleza kuwa hata dawa zinazouzwa kwa bei ndogo sana hutegemea kwa kiasi kikubwa bidhaa zitokanazo na mafuta katika mchakato wa uzalishaji.

    Wataalamu wanaonya kuwa iwapo shinikizo katika mfumo huu wa uzalishaji na usambazaji litaendelea, si tu kwamba bei za dawa zitaongezeka, bali pia baadhi ya malighafi muhimu zinaweza kupatikana kwa shida au kutopatikana kabisa.

  • Trump ashangazwa na Taarifa za kijasusi za Marekani kuhusu makombora ya chini ya ardhi ya Iran

    Trump ashangazwa na Taarifa za kijasusi za Marekani kuhusu makombora ya chini ya ardhi ya Iran

    Taarifa mpya za kijasusi za Marekani zimeeleza kuwa uwezo wa makombora ya chini ya ardhi wa Iran ni mkubwa na tata zaidi kuliko ilivyokadiriwa hapo awali.

    Kwa mujibu wa ripoti iliyochapishwa na Middle East Monitor, tathmini hizi zimewashangaza baadhi ya maafisa wa ngazi za juu nchini Marekani, akiwemo rais Donald Trump.

    Ripoti hizo zinaonyesha kuwepo kwa mtandao mpana wa kile kinachoitwa “miji ya makombora” pamoja na vituo vya kurushia makombora vilivyojengwa chini ya ardhi. Miundombinu hii inadaiwa kuwa imeundwa kwa namna inayoweza kustahimili mashambulizi ya kawaida ya anga.

    Wachambuzi wa usalama wanasema kuwa uwezo huo wa siri unaiwezesha Iran kurusha makombora kwa ghafla na pia kuhamisha vifaa vyake kwa haraka.

    Hali hiyo, kwa mujibu wa tathmini hizo, inaleta changamoto kubwa kwa mikakati ya mashambulizi ya kijeshi ya Washington na pia inaashiria mapungufu katika baadhi ya juhudi za awali za upelelezi.

  • India na UAE Zasaini Mikataba Mpya ya Ulinzi na Nishati Wakati wa Ziara ya Narendra Modi.

    India na UAE Zasaini Mikataba Mpya ya Ulinzi na Nishati Wakati wa Ziara ya Narendra Modi.

    Serikali za India na Falme za Kiarabu (UAE) zimesaini mikataba mipya inayohusu ulinzi na usambazaji wa mafuta ya petroli wakati wa ziara ya kiserikali ya Waziri Mkuu wa India, Narendra Modi, nchini UAE siku ya Ijumaa.

    Kwa mujibu wa Wizara ya Mambo ya Nje ya India (MEA), makubaliano hayo mapya yanaimarisha zaidi “Ushirikiano Mkakati Kamili kati ya India na UAE” ambao tayari upo kati ya nchi hizo mbili.

    Msemaji wa wizara hiyo, Randhir Jaiswal, alisema kuwa ziara hiyo imezaa matokeo saba muhimu. Miongoni mwao ni makubaliano ya ushirikiano kati ya kampuni ya Indian Strategic Petroleum Reserves Limited (ISPRL) na Abu Dhabi National Oil Company (ADNOC).

    Mbali na hilo, pande hizo mbili pia zimekubaliana kuanzisha Ushirikiano Mkakati wa Ulinzi pamoja na mpango wa uwekezaji wa maendeleo wenye thamani ya dola bilioni tano kutoka UAE.