Mkuu wa Jeshi la Sudan, Abdel Fattah al-Burhan, amesema jeshi litaendelea kupigana hadi litakaporejesha maeneo yote yanayodhibitiwa na Rapid Support Forces (RSF), akipuuza wito wa kurejea katika mazungumzo ya kumaliza vita.
Al-Burhan amesema hakuna mazungumzo yatakayofanyika kabla ya kile alichokiita kurejeshwa kwa mamlaka ya dola katika kila sehemu ya Sudan. Kauli hiyo imekuja wakati mapigano yakiongezeka katika maeneo ya Kordofan.
Mapigano hayo yameendelea kusababisha vifo, majeruhi na wimbi jipya la watu kuyakimbia makazi yao, huku mashirika ya misaada yakionya kuhusu kuzorota kwa hali ya kibinadamu.
Vita kati ya Jeshi la Sudan na RSF vilianza Aprili 2023 na vimesababisha moja ya migogoro mikubwa zaidi ya kibinadamu duniani, huku juhudi kadhaa za upatanishi zikishindwa kuleta usitishaji wa kudumu wa mapigano.
Chanzo: Al Jazeera.