Utaridi 2.0 Staging

Mwandishi: Suleiman Ali

  • “Hatupokei wachochezi” Austria yampiga marufuku waziri wa Israel, Itamar Ben-Gvir

    “Hatupokei wachochezi” Austria yampiga marufuku waziri wa Israel, Itamar Ben-Gvir

    VIENNA, AUSTRIA – Shinikizo dhidi ya viongozi wenye msimamo mkali nchini Israel limezidi kupamba moto barani Ulaya baada ya nchi ya Austria kutangaza kuunga mkono pendekezo la kupigwa marufuku kwa Waziri wa Usalama wa Taifa wa nchi hiyo, Itamar Ben-Gvir, kuingia barani humo.

    Kwa mujibu wa ripoti iliyochapishwa na gazeti la Kronen Zeitung, idadi ya wanasiasa mashuhuri ndani ya Umoja wa Ulaya (EU) wanaotaka kuwekewa vikwazo kwa wajumbe wa baraza la mawaziri la utawala wa Israel imeendelea kuongezeka. Hatua hiyo inakuja kutokana na mfululizo wa ghasia na ukandamizaji unaofanywa dhidi ya Wapalestina katika eneo la Ukingo wa Magharibi (West Bank).

    Katika msimamo mkali zaidi, mwanasiasa mashuhuri wa Austria, Beate Meinl-Reisinger, amejitokeza waziwazi kupinga vitendo vya Waziri Ben-Gvir, ambaye anajulikana kwa sera zake kali za mrengo wa kulia.

    Akizungumza siku ya Jumatatu pambezoni mwa mkutano wa Mawaziri wa Mambo ya Nje wa Umoja wa Ulaya uliofanyika mjini Luxembourg, Meinl-Reisinger alibainisha kuwa mienendo ya waziri huyo haikubaliki. Alisisitiza kuwa msimamo huo unatokana na dharau na tabia za kikatili ambazo Ben-Gvir amekuwa akizionesha, hususan dhidi ya wahudumu na washiriki wa misafara ya kutoa misaada ya kibinadamu kuelekea Ukanda wa Gaza.

    “Mtu huyu hakaribishwi hapa kwetu,” alikaririwa Meinl-Reisinger, akionyesha msisitizo wa Austria katika kuungana na mataifa mengine wanachama wa EU yanayotaka kuwajibishwa kwa viongozi wanaochochea uvunjifu wa haki za binadamu.

    Hatua hii ya Austria inatajwa kuwa pigo kadiplomasia kwa serikali ya Israel, ikizingatiwa kuwa mataifa mengi ya Ulaya sasa yanaanza kuchukua hatua madhubuti za kivitendo badala ya kutoa matamko ya kulaani pekee.

  • “Bila mimi, Israel haitakuwepo” – rais Trump apiga mkwara mzito, akosoa mashambulizi ya Beirut

    “Bila mimi, Israel haitakuwepo” – rais Trump apiga mkwara mzito, akosoa mashambulizi ya Beirut

    WASHINGTON, MAREKANI

    Rais wa Marekani, Donald Trump, amedai kuwepo kwa taifa la Israel kunategemea mchango wake binafsi, huku akionyesha kutoridhishwa na namna nchi hiyo inavyoendesha operesheni zake za kijeshi nchini Lebanon.

    Katika mfululizo wa matamshi yake ya hivi karibuni, Rais Trump amesisitiza kuwa bila jitihada na ulinzi wake, taifa la Israel lisingekuwa na uwezo wa kuendelea kuwepo duniani. “Bila mimi, hakutakuwa na Israel,” alikaririwa kiongozi huyo.

    Aidha, Rais Trump amefichua kuwa amewasilisha ujumbe kwa serikali ya Israel akieleza kuwa haungi mkono mashambulizi yanayofanywa na jeshi la nchi hiyo katika mji wa Beirut, Lebanon. Trump amebainisha kuwa amechukizwa na namna Israel inavyoshughulikia mgogoro wa Lebanon, akisema kuwa hali hiyo hairidhishi.

    Katika kile kinachoonekana kama shinikizo la wazi kwa uongozi wa Israel, Rais Trump amemtaka Waziri Mkuu Benjamin Netanyahu kuongeza umakini na kuwa na uwajibikaji mkubwa zaidi kuhusiana na hatua zinazochukuliwa dhidi ya Lebanon.

    “Sijafurahishwa na jinsi Israel inavyoshughulika na Lebanon. Netanyahu lazima sasa awe na uwajibikaji zaidi,” aliongeza Rais Trump.

    Kauli hizi za Rais Trump zinakuja wakati ambapo hali ya usalama Mashariki ya Kati ikiendelea kuwa tete, huku kiongozi huyo akisisitiza msimamo wake juu ya hatma ya kanda hiyo na ushirika kati ya Marekani na Israel.

  • Uingereza kufadhili Nishati ya Nyuklia Ukraine: Mkakati wa Pauni Milioni 210 Wafikiwa G7

    Uingereza kufadhili Nishati ya Nyuklia Ukraine: Mkakati wa Pauni Milioni 210 Wafikiwa G7

    Waziri Mkuu wa Uingereza, Keir Starmer, ametoa ahadi nzito katika mkutano wa kilele wa G7 kwa kuweka bayana mkakati mpya wa kuimarisha usalama wa nishati nchini Ukraine.

    Katika hatua inayolenga kudumisha utulivu wa umeme na viwanda nchini humo, Uingereza imekubaliana kuipatia Ukraine urani iliyoboreshwa (enriched uranium) kwa ajili ya matumizi katika mitambo ya nyuklia hadi mwaka 2028. Mpango huu, unaoungwa mkono na ufadhili wa pauni milioni 210 kutoka kwa serikali ya Uingereza, unalenga kuipa Ukraine uhakika wa nishati katika kipindi hiki kigumu.

    Hatua hii inatazamwa kama nguzo muhimu ya ushirikiano wa kimataifa, ikiiwezesha Ukraine kujimudu kiuchumi na kupunguza utegemezi wa rasilimali za nje wakati huu wa changamoto za kiusalama.

  • FIFA Yapendekeza Mechi ya Israel na Palestina Uwanjani, Je hili ni la jaribio kuosha maovu ya Israel?

    FIFA Yapendekeza Mechi ya Israel na Palestina Uwanjani, Je hili ni la jaribio kuosha maovu ya Israel?

    Marekani – Shirikisho la Soka Duniani (FIFA) limeibua mjadala mzito baada ya kupendekeza mechi ya ufunguzi ya tamasha lake la kwanza la soka la vijana wenye umri chini ya miaka 15 (U-15) liwe kati ya timu za Israel na Palestina.

    Mashindano haya mapya, yaliyopangwa kufanyika nchini Marekani mwezi Septemba, yanalenga kuwakutanisha vijana kutoka mataifa 211 wanachama wa FIFA. Hatua hii imetafsiriwa na baadhi kama jaribio lingine la Rais wa FIFA, Gianni Infantino, kutumia soka kama nyenzo ya kukuza amani na upatanisho.

    Juhudi hizi zinakuja kufuatia jaribio la awali la Infantino mwezi Aprili katika kongamano la FIFA, ambapo alijaribu kuwaunganisha viongozi wa vyama vya soka vya pande zote mbili kwa ajili ya kupeana mikono, hatua ambayo haikufanikiwa.

    Baadhi wametaja suala hili kama jaribio la FIFA kusafisha maovu ya Israel, haswa ikizingatiwa kushindwa kwa FIFA kuipiga marufuku Israel. Shirikisho hilo halikuona haya kusema kwamba soka haitotumika kutatua matatizo ya kisiasa ikisahau marufuku yake kwa Urusi.

    Ingawa Shirikisho la Soka la utawala wa Kizayuni wa Israel limeonyesha utayari wa kushiriki kwa ajili ya kukuza amani, upande wa Palestina bado haujatoa tamko rasmi. Dunia inasubiri kuona iwapo mashindano haya yatakuwa chachu ya umoja au changamoto nyingine ya kidiplomasia uwanjani.

  • Lukashenko aiwashia moto Israel: “Hakuna tukio la kihistoria linalohalalisha mauaji ya watoto Gaza”

    Lukashenko aiwashia moto Israel: “Hakuna tukio la kihistoria linalohalalisha mauaji ya watoto Gaza”

    MINSK, BELARUS

    Rais wa Belarus, Alexander Lukashenko, ametoa tamko zito na la kulaani vikali hatua za kijeshi zinazochukuliwa na Israel katika Ukanda wa Gaza, akihoji uhalali wa mashambulizi hayo dhidi ya raia wasio na hatia.

    Katika kile kinachoonekana kama ukosoaji mkali zaidi kutoka kwake tangu kuanza kwa mzozo huo, Rais Lukashenko ameitaka serikali ya Israel kurejea katika hali ya kawaida na kutafakari upya mustakabali wake.

    Hoja Kuhusu Mauaji na Historia
    Akizungumzia kadhia hiyo, Lukashenko amepuuzia hoja ya kutumia historia ya ‘Holocaust’ (maangamizi makuu ya Wayahudi) kama ngao ya kutekeleza mauaji ya sasa.

    “Ni tukio gani la Holocaust ambalo Waisrael wanalizungumzia, linaloweza kuhalalisha mauaji ya watu wengi kiasi hiki, hasa wanawake na watoto?” alihoji Lukashenko kwa mshangao.

    Aliongeza kuwa idadi kubwa ya watoto wamepoteza maisha Gaza na kwamba jeshi la Israel limefuta kila kitu katika uso wa dunia ndani ya eneo hilo.

    Upumbavu Mtupu
    Rais huyo pia amekemea vikali kile alichokiita kuwa ni mipango ya “ajabu” inayodaiwa kupangwa na baadhi ya watu nchini Israel. Lukashenko ameshutumu taarifa za kuwepo kwa nia ya kujenga maeneo ya mapumziko na starehe (resorts) juu ya maeneo yaliyoharibiwa ambayo bado yana miili ya watu.

    “Sasa wanazungumzia kujenga aina fulani ya maeneo ya starehe juu ya mifupa ya wafu. Huo ni upumbavu mtupu,” alisema Rais Lukashenko.

    Onyo kwa Israel
    Katika hitimisho la kauli yake, kiongozi huyo wa Belarus ametoa onyo akisema kuwa ni wakati muafaka kwa Israel kuzinduka na kutathmini kwa kina namna mataifa mengine yanavyoichukulia na jinsi itakavyoweza kuendelea kuwepo hapo baadaye.

    “Israel inahitaji kurejea katika fahamu zake na kutafakari juu ya kuwepo kwake hapo baadaye,” alisisitiza kiongozi huyo.

    Kauli hii ya Lukashenko inakuja wakati shinikizo la kimataifa likizidi kuongezeka dhidi ya Israel kutokana na hali mbaya ya kibinadamu inayoshuhudiwa katika Ukanda wa Gaza.

  • “B- 52 mwavuli wa nyuklia” : Ndege ya mashambulizi ya masafa marefu ya Marekani yaanguka

    “B- 52 mwavuli wa nyuklia” : Ndege ya mashambulizi ya masafa marefu ya Marekani yaanguka

    CALIFORNIA, MAREKANI

    Jeshi la Anga la Marekani limepata pigo kubwa baada ya moja ya ndege zake muhimu na zenye nguvu zaidi, aina ya B-52 Stratofortress, kuanguka muda mfupi baada ya kupaa katika jimbo la California.

    Ndege hiyo, ambayo inachukuliwa kuwa uti wa mgongo wa mashambulizi ya masafa marefu ya Marekani, inaripotiwa kuwa miongoni mwa zana zilizokuwa zikishiriki katika operesheni za kijeshi nchini Iran wakati huu wa mivutano ya kivita kati ya Marekani, Israel, na Iran.

    Uwezo wa Kutisha wa B-52

    Ndege ya B-52 ni kielelezo cha nguvu ya kijeshi ya Marekani. Ina uwezo wa kupaa hadi kimo cha futi 50,000—juu zaidi ya ndege za abiria ambazo hupaa kimo cha futi 35,000. Aidha, ndege hii ina uwezo wa kubeba shehena ya silaha yenye uzito wa ratili (lbs) 70,000, ikijumuisha mamia ya mabomu ya kawaida na makombora 32 ya nyuklia (nuclear cruise missiles).

    Sifa ya kipekee ya B-52 ni uwezo wake wa kuongezewa mafuta ikiwa angani, jambo linaloifanya kuwa na uwezo wa kushambulia mahali popote duniani bila kuhitaji kutua. Wakati wa enzi za Vita Baridi, ndege hii ilitumika kama “mwavuli wa nyuklia” wa Marekani chini ya sera ya maangamizi ya pande zote (Mutually Assured Destruction)