Utaridi 2.0 Staging

Kategoria: KIMATAIFA

  • Marekani ashindwa, aungana na Uingereza kusaka muungano wa kimataifa kufungua Hormuz

    Marekani ashindwa, aungana na Uingereza kusaka muungano wa kimataifa kufungua Hormuz

    Serikali ya Marekani, ikishirikiana na Uingereza, inapanga kuandaa mkutano wa ngazi ya juu wiki ijayo mjini London lengo likiwa ni kuunda muungano wa kimataifa wa kijeshi ili kulinda na kufungua tena njia ya kimkakati ya baharini ya Mlango wa Hormuz. Hatua hii inajiri huku Washington ikitafuta njia ya kutokea katika mkwamo huo wa kimbinu uliotishia udhibiti wake wa kijeshi na kiuchumi dhidi ya mataifa yanayojitegemea katika eneo hilo.

    Kulingana na taarifa zilizofichuliwa na mtandao wa habari wa Axios zikitaja wanadiplomasia wa Ulaya, Marekani imeomba msaada wa dharura kutoka kwa mataifa ya Magharibi baada ya kukabiliwa na ugumu wa kudhibiti hali hiyo peke yake. Inaarifiwa kuwa Uingereza na Ufaransa zimefanikiwa kushawishi baadhi ya nchi kujiunga na operesheni hiyo inayolenga kurejesha ushawishi wa Magharibi katika njia hiyo kuu ya mafuta duniani.

    Hata hivyo, jitihada hizo za kibeberu zinakutana na ukuta kutoka kwa mataifa mbalimbali yanayopinga kutumiwa vibaya kwa ajenda za kivita. Mwandishi wa habari wa Al Jazeera jijini Washington, Wajd Waqfi, ameripoti kuwa baadhi ya nchi zilizombwa kujiunga zimekausha msimamo na kuweka sharti thabiti: ushiriki wao usivuke mipaka ya usalama wa Mlango wa Hormuz na zisijushe kabisa katika vita vya upande mmoja vinavyoongozwa na Marekani.

    Akibainisha kushindwa kwa mbinu za shinikizo za Magharibi dhidi ya upinzani wa kikanda, mwanadiplomasia wa zamani wa Marekani, Michael Ratney, amekiri wazi ugumu wa kibarua kinachoikabili Washington.

    “Dhamira hii haitakuwa rahisi hata kidogo, baada ya Wairani kudhihirisha uwezo wao mkubwa wa kuvumilia na kupambana kwa muda mrefu kuliko Marekani na washirika wake,” alisema Ratney.

  • Trump aonya China na Urusi dhidi ya kuiuzia Iran silaha

    Trump aonya China na Urusi dhidi ya kuiuzia Iran silaha

    Rais wa Marekani Donald Trump amezionya China na Urusi dhidi ya kuipatia Iran silaha, akisema hatua hiyo ingekuwa na madhara makubwa kwa nchi hizo wakati vita kati ya Washington na Tehran vikiendelea.

    Trump alisema amepokea uhakikisho kutoka kwa Rais wa China Xi Jinping na Rais wa Urusi Vladimir Putin kwamba mataifa yao hayauzi silaha kwa Iran, ikiwemo kupitia kampuni binafsi.

    “Kwa hiyo, mataifa mawili makubwa ambayo mara nyingi yanatajwa kuhusu Iran, kwa maoni yangu, hayashiriki,” Trump aliandika katika mtandao wake wa Truth Social.
    Aliongeza kuwa iwapo China au Urusi zingebadili msimamo na kuanza kuisaidia Iran kwa silaha, hatua hiyo “ingekuwa mbaya sana kwao” na isingekuwa katika maslahi yao.

    Kauli hiyo imekuja wakati Marekani ikiendelea kufuatilia uwezekano wa Tehran kupata silaha, taarifa za kijasusi au teknolojia ya kijeshi kutoka kwa washirika wake wa kimataifa.
    Ingawa Trump amesema Beijing na Moscow hazishiriki katika vita, taarifa za hivi karibuni zimeonyesha kuwa mashirika ya ujasusi ya Marekani yanachunguza uwezekano wa Urusi kuisaidia Iran katika ulengaji wa mashambulizi au teknolojia ya ndege zisizo na rubani. Hakuna hitimisho la mwisho lililotangazwa kuhusu uchunguzi huo.

    Marekani pia imeweka vikwazo dhidi ya baadhi ya kampuni za China na Urusi zinazotuhumiwa kusaidia Iran kupata vifaa vinavyoweza kutumika kijeshi.

  • Pentagon yapunguza idadi ya wanajeshi wa Marekani waliouawa katika vita vya Iran kutoka 18 hadi 14

    Pentagon yapunguza idadi ya wanajeshi wa Marekani waliouawa katika vita vya Iran kutoka 18 hadi 14

    Maafisa wa kijeshi na msemaji wa Pentagon wametoa maelezo yanayokinzana kuhusu kuondolewa kwa majina ya wanajeshi wanne waliouawa baada ya tangazo la usitishaji mapigano.

    WASHINGTON, MAREKANI — Pentagon imepunguza ghafla idadi rasmi ya wanajeshi wa Marekani waliouawa katika vita dhidi ya Iran kutoka 18 hadi 14, hatua iliyozua maswali mapya kuhusu uwazi wa serikali katika kuripoti madhara ya kibinadamu ya mzozo huo.

    Kwa mujibu wa ripoti ya The New York Times, mfumo rasmi wa Pentagon wa kurekodi vifo vya wanajeshi ulikuwa umeonyesha vifo 18 siku ya Jumatano, lakini idadi hiyo ikashuka hadi 14 siku iliyofuata.

    Maafisa watatu wa kijeshi waliiambia gazeti hilo kuwa wanajeshi wanne waliondolewa katika orodha kwa sababu walifariki baada ya Rais Donald Trump kutangaza usitishaji mapigano. Waliotajwa ni wanajeshi watatu waliouawa katika shambulizi nchini Jordan na mwingine aliyefariki katika tukio nchini Iraq.

    Hata hivyo, msemaji wa Pentagon, Joel Valdez, alitoa maelezo tofauti, akisema mabadiliko hayo yalitokana na matatizo ya muda katika mfumo wa data wa tovuti, na si uamuzi wa kuwatenga wanajeshi hao kwa sababu ya tarehe za vifo vyao.

    Tofauti hizo zimeacha sintofahamu kuhusu iwapo idadi ya 14 inawakilisha wanajeshi wote waliouawa kutokana na vita hivyo au ni wale pekee ambao Pentagon inawatambua kama waliofariki ndani ya kipindi rasmi cha operesheni kabla ya tangazo la usitishaji mapigano.

    Wanajeshi hao wanne walikuwa tayari wametajwa katika taarifa nyingine za Pentagon, na miili yao ilipokelewa nchini Marekani katika taratibu rasmi za kijeshi. Hali hiyo imeongeza ukosoaji kwamba kuondolewa kwao katika hesabu kuu hakubadilishi ukweli kwamba walifariki kutokana na mashambulizi yanayohusiana na mzozo wa Iran.

    Kabla ya mabadiliko hayo, Rais Trump na viongozi wa Pentagon walikuwa wametaja vifo 18 vya wanajeshi wa Marekani, huku zaidi ya wanajeshi 400 wakiripotiwa kujeruhiwa tangu kuanza kwa vita. Reuters pia ilikuwa imeripoti idadi ya vifo 18 wakati ikieleza gharama inayoongezeka ya mzozo huo kwa Marekani.

    Hatua ya Pentagon imeibua pia swali la iwapo tangazo la usitishaji mapigano linaweza kutumiwa kama mpaka wa kiutawala wa kutenganisha vifo vinavyohusiana na vita, hata kama mashambulizi na operesheni za kijeshi ziliendelea baada ya tangazo hilo.

    Wakosoaji wanasema hesabu ya vifo vya vita inapaswa kuzingatia chanzo cha tukio, si tu tarehe iliyotokea. Kwa mtazamo huo, mwanajeshi aliyefariki katika shambulizi la Iran baada ya tangazo la usitishaji mapigano bado anapaswa kuhesabiwa miongoni mwa waliouawa katika vita hivyo.

    Pentagon haijaweka wazi kama majina ya wanajeshi hao yatarejeshwa katika mfumo wake, wala haijatoa maelezo ya kina kuhusu kile ilichokiita “matatizo ya muda ya data.”

    Vyanzo: The New York Times, The Guardian, Reuters na taarifa za Pentagon
    Julai 24, 2026 | Washington, Marekani

  • Waingereza Wakosa Imani na Jeshi Lao: Ni Asilimia 6 Pekee Tayari Kujitolea Kulinda Nchi

    Waingereza Wakosa Imani na Jeshi Lao: Ni Asilimia 6 Pekee Tayari Kujitolea Kulinda Nchi

    Ni asilimia 6 pekee ya Waingereza walio tayari kujitolea kujiunga na jeshi iwapo nchi yao itakabiliwa na uvamizi, huku wengi wakikosa imani na uwezo wa vikosi vya Uingereza kuilinda nchi.

    LONDON, UINGEREZA — Utafiti wa YouGov unaonyesha asilimia 6 tu ya Waingereza wako tayari kujitolea kupigana iwapo nchi itavamiwa, huku asilimia 14 wakisema wangetumikia jeshi wakipewa wito rasmi.

    Matokeo hayo yanaonyesha pengo kati ya hofu ya mashambulizi na utayari wa wananchi kushiriki ulinzi wa nchi. Asilimia 29 wanaamini kuna uwezekano wa shambulio ndani ya miaka 10 ijayo, lakini asilimia 51 wanaona uwezekano huo kuwa mdogo.

    Utafiti pia umeonyesha kuwa asilimia 53 ya Waingereza hawana imani ya kutosha na uwezo wa vikosi vya kijeshi vya nchi hiyo kuilinda Uingereza katika mazingira ya vita vikubwa.

    Matokeo hayo yanaendana na tafiti nyingine za YouGov ambazo zimeonyesha wasiwasi mkubwa kuhusu uwezo wa jeshi la Uingereza. Katika utafiti mwingine, asilimia 54 ya Waingereza walisema walikuwa na imani ndogo au hawakuwa na imani kabisa kwamba vikosi vya Uingereza vinaweza kuilinda nchi ipasavyo katika vita vikubwa.

    Wakati huo huo, asilimia 57 ya waliohojiwa katika utafiti mpya walisema serikali ya Uingereza inatumia fedha kidogo mno katika sekta ya ulinzi.

    Hata hivyo, hamu ya kuongeza bajeti ya jeshi haijaambatana na utayari wa wananchi kukubali gharama zake. Ni watu wachache wanaounga mkono kuongeza kodi, kupunguza matumizi ya huduma za umma au kuongeza mikopo ya serikali ili kugharamia matumizi makubwa zaidi ya ulinzi.

    Utafiti wa YouGov uliochapishwa Juni 2026 pia ulionyesha kuwa wananchi wengi wanataka fedha zaidi zielekezwe katika ulinzi, lakini hawana mwafaka kuhusu chanzo cha fedha hizo. Baadhi ya wapiga kura wanapinga kupunguzwa kwa huduma za afya, elimu na ustawi wa jamii ili kuongeza bajeti ya kijeshi.

    Matokeo haya yanaibua maswali kuhusu kiwango cha uzalendo, imani katika serikali na uhusiano kati ya wananchi wa Uingereza na taasisi zake za kijeshi.

    Tafiti za awali zimeonyesha kuwa utayari wa kupigana hutegemea mazingira ya tishio. Utafiti wa YouGov wa mwaka 2024 ulionyesha kuwa miongoni mwa Waingereza wenye umri wa miaka 18 hadi 40, asilimia 11 wangeshiriki kwa kujitolea iwapo Uingereza ingekuwa chini ya tishio la moja kwa moja la uvamizi, huku asilimia 23 wakisema wangetumikia jeshi iwapo wangeitwa.

  • Pentagon yashutumiwa kuficha taarifa za majeruhi wa wanajeshi wa Marekani katika vita na Iran

    Pentagon yashutumiwa kuficha taarifa za majeruhi wa wanajeshi wa Marekani katika vita na Iran

    Ripoti ya CNN yadai Idara ya Ulinzi ya Marekani imekuwa ikichelewesha kutangaza idadi ya wanajeshi waliojeruhiwa kutokana na mashambulizi ya Iran, ikisema hatua hiyo inalenga kulinda usalama wa wanajeshi wake.
    Idara ya Ulinzi ya Marekani (Pentagon) imekuwa ikichelewa kutoa taarifa za wazi kuhusu majeruhi miongoni mwa wanajeshi wake wakati vita vinavyoendelea na Iran, huku ikiepuka kuthibitisha hadharani madhara ya mashambulizi ya Iran dhidi ya vikosi vya Marekani, kwa mujibu wa ripoti ya kituo cha CNN.


    Kwa mujibu wa ripoti hiyo, takwimu nyingi kuhusu majeruhi zimekuwa zikiwekwa kwenye tovuti maalumu ya jeshi la Marekani ambayo mara nyingi husasishwa kwa kuchelewa kwa siku kadhaa au hata wiki, hali inayozua maswali kuhusu uwazi wa taarifa wakati wa mzozo wa kijeshi.


    Maafisa wa Marekani waliliambia CNN kuwa ucheleweshaji huo unalenga kulinda wanajeshi waliopo katika maeneo ya operesheni, kuzuia maadui kupata taarifa za haraka kuhusu athari za mashambulizi, pamoja na kulinda usalama wa vikosi vinavyohusika.


    Hata hivyo, baadhi ya wakosoaji wamesema ukosefu wa taarifa za haraka unaweza kuathiri imani ya umma na kuongeza mashaka kuhusu kiwango halisi cha madhara yanayosababishwa na mapigano hayo.
    Mzozo kati ya Marekani na Iran umeongeza mashambulizi dhidi ya vituo vya kijeshi na maslahi ya pande zote katika eneo la Mashariki ya Kati, huku Washington na Tehran zikitoa taarifa zinazotofautiana kuhusu ukubwa wa uharibifu na mafanikio ya operesheni zao.


    Pentagon kwa kawaida huwa na utaratibu wa kutoa taarifa kuhusu majeruhi wa wanajeshi wa Marekani, lakini katika mazingira ya vita na mashambulizi yanayoendelea, maafisa wa kijeshi wamekuwa wakisisitiza umuhimu wa kusawazisha uwazi wa umma na mahitaji ya kiusalama.

  • Ujasusi wa Israel wadai Iran ilihamisha maelfu ya mashine za kurutubisha urani katika kituo cha chini ya ardhi karibu na Natanz

    Ujasusi wa Israel wadai Iran ilihamisha maelfu ya mashine za kurutubisha urani katika kituo cha chini ya ardhi karibu na Natanz

    Tel Aviv/Tehran — Ujasusi wa Israel umetathmini kuwa Iran ilihamisha maelfu ya mashine za kurutubisha urani (nuclear centrifuges) kwenda katika eneo la Mlima Pickaxe, kituo cha nyuklia kilicho chini ya ardhi na chenye ulinzi mkali karibu na Natanz.

    Kwa mujibu wa taarifa hizo, Israel iliifahamisha Marekani kuwa taarifa zake za kijasusi zinaonyesha uhamishaji huo ulifanyika mwishoni mwa mwaka uliopita, baada ya vita vya siku 12 mnamo Juni 2025, ambapo Marekani ilifanya mashambulizi dhidi ya maeneo ya nyuklia ya Iran kwa kutumia ndege za mabomu aina ya B-52.

    Taarifa hiyo haijaeleza idadi kamili ya mashine zilizohamishwa wala kutoa ushahidi wa wazi unaothibitisha madai hayo.

    Hatua hiyo inadaiwa kuwa sehemu ya juhudi za Iran kulinda miundombinu yake ya nyuklia dhidi ya mashambulizi yanayoweza kutokea, huku suala la mpango wa nyuklia wa Tehran likiendelea kuwa chanzo cha mvutano kati ya Iran, Israel na Marekani.