Utaridi 2.0 Staging

Lebo: Afrika

  • UN kupigia kura ramani mpya inayoonyesha ukubwa halisi wa Afrika

    UN kupigia kura ramani mpya inayoonyesha ukubwa halisi wa Afrika

    NEW YORK, MAREKANI — Baraza Kuu la Umoja wa Mataifa linatarajiwa kupigia kura Ijumaa azimio linalohimiza matumizi ya ramani za dunia zinazoonyesha kwa usahihi zaidi ukubwa wa mabara na nchi, hatua inayoungwa mkono na Umoja wa Afrika.

    Azimio hilo, linaloongozwa na Togo kwa niaba ya Afrika, linapendekeza matumizi ya ramani ya Equal Earth na ramani nyingine zinazohifadhi uwiano wa ukubwa wa maeneo, badala ya kutegemea ramani ya Mercator katika mazingira ambayo ukubwa wa kijiografia ni muhimu.

    Ramani ya Mercator iliundwa mwaka 1569 kwa madhumuni ya urambazaji baharini. Hata hivyo, inapowasilisha dunia nzima, maeneo yaliyo karibu na ncha za dunia huonekana makubwa kupita kiasi, huku maeneo yaliyo karibu na Ikweta yakionekana madogo kwa kulinganisha.

    Mfano maarufu ni Greenland, ambayo kwenye Mercator inaweza kuonekana kuwa na ukubwa unaokaribiana na Afrika. Kiuhalisia, Afrika ni takriban mara 14 ya ukubwa wa Greenland.

    Kampeni ya Correct the Map, iliyoidhinishwa na Umoja wa Afrika mwaka 2025, inasema upotoshaji huo umechangia kwa muda mrefu kupunguza taswira ya ukubwa na umuhimu wa Afrika katika fikra za kimataifa.

    Hata hivyo, wataalamu wa ramani wanaeleza kuwa hakuna ramani tambarare inayoweza kuonyesha Dunia bila aina fulani ya upotoshaji. Equal Earth inalenga kuhifadhi uwiano sahihi wa ukubwa wa maeneo, lakini nayo hulazimika kufanya kompromasi katika maumbo, umbali au mwelekeo.

    Azimio hilo halitafuta kuifuta Mercator kabisa. Badala yake, linataka serikali, shule, mashirika ya kimataifa na majukwaa ya teknolojia kutumia ramani zenye uwiano sahihi zaidi pale zinapolinganisha ukubwa wa nchi na mabara.

  • Mfahamu mwanasiasa wa Uganda anayegombea nafasi ya katibu mkuu wa Umoja wa Mataifa

    Mfahamu mwanasiasa wa Uganda anayegombea nafasi ya katibu mkuu wa Umoja wa Mataifa

    Uganda imemuidhinisha mwanadiplomasia na mwanasiasa mkongwe Olara Otunnu kuwa mgombea wake katika kinyang’anyiro cha nafasi ya Katibu Mkuu ajaye wa Umoja wa Mataifa (UN).

    Otunnu, ambaye anaungwa mkono na serikali ya Uganda, yuko mjini New York kwa ajili ya kukutana na ujumbe wa nchi wanachama na kufanya mazungumzo na wawakilishi wa Mkutano Mkuu wa Umoja wa Mataifa pamoja na Baraza la Usalama la UN, kwa mujibu wa Balozi wa Kudumu wa Uganda katika Umoja wa Mataifa, Adonia Ayebare.

    Ayebare amesema safari hiyo inalenga kumpa Otunnu fursa ya kuwasilisha maono yake na kushiriki mazungumzo ya moja kwa moja na wadau muhimu katika mchakato wa kumpata kiongozi mpya wa Umoja wa Mataifa.

    Olara Otunnu ana uzoefu mkubwa katika diplomasia ya kimataifa. Alisoma katika Chuo Kikuu cha Oxford na Shule ya Sheria ya Harvard (Harvard Law School), kabla ya kuanza kazi yake katika masuala ya kimataifa.

    Kati ya mwaka 1980 na 1985, Otunnu aliwahi kuwa mwakilishi wa Uganda katika Umoja wa Mataifa, ambapo alihudumu kwa kipindi cha mwaka mmoja kama Rais wa Baraza la Usalama la Umoja wa Mataifa.

    Pia aliwahi kushika nafasi ya Naibu Katibu Mkuu wa Umoja wa Mataifa anayehusika na Watoto na Migogoro ya Kivita kati ya mwaka 1997 na 2005, akiongoza juhudi za kimataifa za kulinda watoto katika maeneo yenye vita.

    Katika kinyang’anyiro hicho, Otunnu anatarajiwa kutumia uzoefu wake wa muda mrefu katika diplomasia, usuluhishi wa migogoro na masuala ya amani ili kujenga uungwaji mkono kutoka mataifa mbalimbali.

  • Wasira aiweka sawa Jumuiya ya Madola: “Tanzania haisubiri kuamrishwa”

    Wasira aiweka sawa Jumuiya ya Madola: “Tanzania haisubiri kuamrishwa”

    Makamu Mwenyekiti wa CCM Tanzania Bara, Stephen Wasira, amesema Tanzania iko tayari kupokea ushauri kutoka kwa washirika wa kimataifa, lakini haitakubali maagizo yanayoingilia masuala yake ya ndani.w

    Makamu Mwenyekiti wa Chama Cha Mapinduzi (CCM) Tanzania Bara, Stephen Wasira, amepinga kauli na msimamo wa Jumuiya ya Madola kuhusu masuala ya ndani ya Tanzania, akisema nchi hiyo ni huru na haiwezi kuamrishwa namna ya kuendesha taasisi zake.

    Akizungumza katika mahojiano na kituo cha televisheni cha ITV siku ya Jumanne, Wasira alisema Tanzania haijajitenga na jumuiya ya kimataifa na iko tayari kusikiliza ushauri kutoka kwa washirika mbalimbali, lakini alisisitiza kuwa maamuzi ya ndani yanapaswa kubaki chini ya mamlaka ya nchi.

    “Hatujakataa kuridhiana, lakini Jumuiya ya Madola haiwezi kutuamrisha kuingilia Mahakama. Kuna mambo wanaweza kutushauri na hatukatai kushauriwa, lakini haiwezi kutuamrisha, inakuwa inatuingilia uhuru wetu,” alisema Wasira.

    Aliongeza kuwa Tanzania ina uhusiano na mataifa na jumuiya mbalimbali duniani, akitaja Umoja wa Ulaya, Marekani, Urusi na China kama baadhi ya washirika ambao nchi hiyo inaweza kushirikiana nao katika masuala ya maendeleo na diplomasia.
    Kauli hiyo imekuja baada ya Jumuiya ya Madola kutoa wito kwa Tanzania kuchukua hatua kuhusu masuala yanayohusu utawala wa sheria na haki za kisiasa, ikiwemo suala la Mwenyekiti wa Chama cha Demokrasia na Maendeleo (CHADEMA), Tundu Lissu, ambaye amekuwa akishikiliwa gerezani kwa tuhuma za uhaini tangu Aprili 2025.

    Jumuiya hiyo imetoa muda wa siku 30 kwa Tanzania kushughulikia suala hilo, hatua iliyozua mjadala kuhusu mipaka kati ya ushirikiano wa kimataifa na mamlaka ya ndani ya nchi.

    Serikali ya Tanzania imekuwa ikisisitiza kuwa taasisi zake za kisheria zinafanya kazi kwa uhuru na kwamba masuala yanayohusu kesi mahakamani yanapaswa kuachwa kupitia taratibu za kisheria.

    Kwa upande mwingine, vyama vya upinzani na baadhi ya mashirika ya haki za binadamu vimekuwa vikitoa wito wa kuhakikisha kuwa haki za msingi za kisiasa na taratibu za kisheria zinafuatwa katika kushughulikia kesi zenye uzito wa kisiasa.

  • Ni marufuku: Rais Ramaphosa Awashukia Wanaowasaka Wageni Afrika Kusini

    Ni marufuku: Rais Ramaphosa Awashukia Wanaowasaka Wageni Afrika Kusini

    PRETORIA, AFRIKA KUSINI: Rais wa Afrika Kusini, Cyril Ramaphosa, ametoa onyo kali dhidi ya makundi ya raia wanaojichukulia sheria mkononi kwa kuwasimamisha na kuwakagua vitambulisho raia wa kigeni mitaani.

    Akihutubia taifa kufuatia kuongezeka kwa taharuki na vitisho dhidi ya wahamiaji, Rais Ramaphosa amepiga marufuku vitendo hivyo na kusisitiza kuwa serikali haitavumilia uvunjifu wa amani. Amesema kuwa hakuna raia au kikundi cha kijamii chenye mamlaka ya kisheria ya kuhoji uhalali wa mgeni mtaani, kwani jukumu hilo ni la vyombo vya dola.

    Hotuba hii imekuja kufuatia tishio la baadhi ya makundi yaliyoweka msimamo wa kuwataka wahamiaji wasio na nyaraka kuondoka nchini humo ifikapo Juni 30, 2026. Rais ameonya kuwa changamoto za ndani, ikiwemo ukosefu wa ajira, zisitumike kama kisingizio cha kuchochea chuki na vurugu.

    “Ninajua kuwa Waafrika Kusini si watu wanaochukia wageni. Hatupaswi kushawishiwa na wale wanaotaka tuwageuke watu ambao hawakuzaliwa katika nchi hii,” alisisitiza kiongozi huyo.

    Rais amehitimisha kwa kutoa wito kwa wananchi kudumisha amani na kufuata taratibu za kisheria badala ya kujiingiza kwenye vitendo vinavyoweza kuhatarisha usalama wa nchi na taswira ya Afrika Kusini kimataifa.

  • Askofu Bagonza: Hakuna dhehebu lenye uwezo wa kutuchagulia rais, Akanusha njama za 2030

    Askofu Bagonza: Hakuna dhehebu lenye uwezo wa kutuchagulia rais, Akanusha njama za 2030

    Askofu wa Kanisa la Kiinjili la Kilutheri Tanzania (KKKT) Dayosisi ya Karagwe Dkt. Benson Bagonza amesema Kanisa hilo halijawahi kukaa kikao chochote cha kupanga Rais ajae wala hakuna Dhehebu lenye uwezo wa kuchagua nani awe Rais.

    Askofu Dkt. Bagonza ametoa kauli hiyo wakati wa Maadhimisho ya Siku ya Dayosisi maarufu ‘KAD DAY’ ambapo Mgeni rasmi alikuwa ni Waziri Ofisi ya Waziri Mkuu, Kazi, Ajira na Uhusiano, Deus Sangu.

    “Kitengo chako cha mahusiano kinayahusisha Makanisa, Misikiti na makundi yote ya kiimani, sisi sote wa Makanisa tupo chini yako kwa ajili ya uratibishaji wa mahusiano na makundi haya ya imani ni muhimu kwa sababu ndani yake kuna Vyama vyote, Makabila yote, Rangi zote, Maskini na Matajiri.”

    “Sisi kama KKKT hatujawahi kukaa kikao chochote kupanga Rais ajaye, hatujawahi na hatuna mpango huo kwani tunaamini hakuna Dhehebu lolote Nchini lenye uwezo wa kutuchagulia Rais, nayasema haya ili kukemea njama ya kuchafua Kanisa letu kwamba tunapanga kuweka Rais mwaka 2030” Askofu Dkt.Bagonza.

  • Julius Malema Ahoji Kwanini Mnangagwa (rais wa Zimbabwe) Alinusurika Corona Ila Sio Magufuli

    Julius Malema Ahoji Kwanini Mnangagwa (rais wa Zimbabwe) Alinusurika Corona Ila Sio Magufuli

    JOHANNESBURG, 17 Mei 2026 — Kiongozi wa chama cha Economic Freedom Fighters (EFF), Julius Malema, amezua mjadala kufuatia kauli yake ya kuhoji namna janga la COVID‑19 lilivyodai maisha ya aliyekuwa Rais wa Tanzania, hayati John Magufuli, huku Rais wa Zimbabwe, Emmerson Mnangagwa, akiendelea kuishi.

    Akizungumza katika hafla ya kisiasa, Malema alimwelezea Magufuli kama “rais aliyekuwa mstari wa mbele katika utekelezaji wa majukumu yake,” na kudai kuwa aliondolewa na virusi vya corona.

    Katika maelezo yake, alihoji kwa nini janga hilo “halikumgusa” Mnangagwa, ambaye alimkosoa vikali kwa kumtaja kama kiongozi asiye na uwezo.

    Kauli hiyo imeibua mjadala katika mitandao ya kijamii na miongoni mwa wachambuzi wa siasa, huku baadhi wakiona ni maoni ya kisiasa yenye lengo la kukosoa uongozi wa Zimbabwe, na wengine wakisisitiza umuhimu wa kuheshimu kumbukumbu za viongozi waliotangulia mbele ya haki.

    Hadi sasa, hakujawa na majibu rasmi kutoka serikalini Zimbabwe kuhusu kauli hizo.