Utaridi 2.0 Staging

Lebo: habari

  • Papa Leo: Vita dhidi ya Iran ‘Sio vya haki’

    Papa Leo: Vita dhidi ya Iran ‘Sio vya haki’

    Katika kauli yenye ukali dhidi ya sera za Rais wa Marekani Donald Trump, Kiongozi wa Kanisa Katoliki Duniani amesema kwamba vita vya Marekani na Israel dhidi ya Iran havina uhalali wa maadili.

    Papa Leo wa Kumi na Nne amesema kuwa vita vya Marekani na Israel dhidi ya Iran havitimizi viwango vya “vita vya haki” kwa mujibu wa mafundisho ya Katoliki, akirudia msimamo aliowahi kutoa hapo awali wakati wa ziara yake mjini Madrid.

    Akijibu maswali ya waandishi wa habari wikiendi akiwa safaraini kutoka Roma kuelekea Madrid, Kiongozi wa Kanisa Katoliki amesema: “Katika suala la Iran, vigezo vya kuhalalisha vita vya haki havipo.”

    Ameongeza kuwa nadharia ya jadi ya vita vya haki iliundwa katika kipindi ambacho binadamu hangeweza kufikiria kiwango cha uharibifu wa silaha za kisasa.

    Kauli hizi zinakuja baada ya tofauti za awali na Makamu wa Rais wa Marekani JD Vance, ambaye alikuwa ametetea mzozo huo kama “vita vya haki”, jambo ambalo Papa alilikataa.

    Wakati Marekani na Israeli zilipoanzisha vita haramu dhidi ya Iran Februari 28,, Papa Leo alitoa wito mara kwa mara wa kusitishwa kwa vita na kukosoa kauli kali ambazo alisema zinaweza kuchochea kuongezeka zaidi kwa mvutano.

    Katikati ya vita hivyo vilivyoendelea kwa siku 40, alielezea tishio la Donald Trump kwamba “ataangamizwa ustaarabu wa Iran” kuwa kauli isiyokubalika.

    Trump baadaye alijibu kwa kumtaja papa kuwa “dhaifu na mbaya sana katika masuala ya sera ya kigeni.”

    Papa alikataa ukosoaji huo, akisema hana hofu na ataendelea kuzungumza dhidi ya vita. Katika moja ya hotuba zake, alikosoa vikali vita vya Marekani na Israel dhidi ya Iran, akivitaja kuwa ni fedheha kwa familia nzima ya kibinadamu na mtihani mkubwa wa maadili kwa ulimwengu mzima.

    Mabadilishano hayo ya kauli pia yalizua mijadala nchini Italia, ambapo baadhi ya viongozi wa kisiasa walikosoa vikali matamshi ya Trump na kuonyesha uungaji mkono kwa wito wa papa wa kutafuta amani.

    Waziri Mkuu wa Italia, Giorgia Meloni, alielezea kauli zilizoelekezwa kwa Papa Leo kuwa “hazikubaliki.”

  • Axios: “utakuwa peke yako” onyo kali la Trump lilivyozima mpango wa Israel kukipiga na Iran

    Axios: “utakuwa peke yako” onyo kali la Trump lilivyozima mpango wa Israel kukipiga na Iran

    WASHINGTON/JERUSALEM – Ripoti mpya kutoka kwa shirika la habari la Axios imefichua mivutano ya chinichini iliyopelekea Israel kusitisha mpango wake wa awali wa kutekeleza mashambulizi makubwa ya anga dhidi ya nchi ya Iran.

    Kwa mujibu wa ripoti hiyo, awali Israel ilikuwa imekamilisha maandalizi ya wimbi kubwa la mashambulizi dhidi ya Iran, hali ambayo ingetishia kuingiza eneo lote la Mashariki ya Kati katika vita kamili. Hata hivyo, mpango huo ulizimwa ghafla kufuatia mazungumzo ya simu kati ya Donald Trump na Waziri Mkuu wa Israel, Benjamin Netanyahu.

    Onyo la Moja kwa Moja
    Vyanzo vya habari vinaeleza kuwa katika mazungumzo hayo, Trump alitoa onyo la wazi na kali kwa Netanyahu akimstahadharisha kuhusu hatari ya kuendelea na mashambulizi hayo bila tahadhari.

    Trump ananukuliwa akisema: “Bibi, ni bora uwe mwangalifu, la sivyo utajikuta peke yako hivi karibuni” (Bibi, you better be careful, or you will be on your own very soon). Onyo hilo lilitafsiriwa kama ishara kuwa Marekani inaweza kuondoa ulinzi au msaada wake wa kidiplomasia na kijeshi ikiwa Israel itachochea vita vikubwa zaidi.

    Makubaliano ya Kusitisha Mapigano
    Kufuatia shinikizo hilo kutoka kwa Trump, Netanyahu anaripotiwa kulegeza msimamo wake na kukubali kusitisha mashambulizi hayo yaliyokuwa yamepangwa.

    Hata hivyo, Netanyahu ameweka sharti moja kuu: Israel itasitisha harakati hizo mradi tu Iran nayo iache mara moja mashambulizi yake dhidi ya maeneo ya Israel. Hatua hii inaonekana kama juhudi za kuzuia mlipuko wa vita ambao ungetikisa usalama wa dunia na soko la nishati kimataifa.

    Hadi sasa, ofisi ya Waziri Mkuu wa Israel haijatoa tamko rasmi kuhusu maelezo hayo ya simu yaliyofichuliwa na Axios.

  • J.D Vance afichua tofauti za kimaslahi kati ya Marekani na Israel; azungumzia fursa mpya kuhusu Iran

    J.D Vance afichua tofauti za kimaslahi kati ya Marekani na Israel; azungumzia fursa mpya kuhusu Iran

    WASHINGTON – Makamu wa Rais wa Marekani, J.D. Vance, ametoa kauli mpya kuhusu uhusiano wa nchi hiyo na mshirika wake mkuu Mashariki ya Kati, akibainisha kuwa maslahi ya Marekani na Israel hayafanani katika baadhi ya masuala.

    Akizungumza katika mahojiano maalumu na kituo cha habari cha Fox News, Vance ameeleza kuwa licha ya ushirikiano uliopo, kuna “mafaili” au maeneo maalumu ambapo mitazamo na maslahi ya Washington yanatofautiana na yale ya Tel Aviv.

    Vance hakufafanua kwa kina masuala hayo, lakini alisisitiza kuwa utofauti huo ni sehemu ya uhalisia wa sera za kigeni ambapo kila taifa huangalia maslahi yake ya msingi.

    Fursa ya Makubaliano na Iran
    Katika hatua nyingine, Makamu huyo wa Rais amegusia mivutano ya kinyuklia inayohusisha taifa la Iran. Vance amedai kuwa mabadiliko na matukio yaliyojitokeza katika miezi ya hivi karibuni yamefungua “dirisha la kipekee” la fursa.

    Amesema kuwa hali ya sasa inatoa nafasi ya kufikiwa kwa makubaliano ya muda mrefu na ya kudumu kuhusu mpango wa nyuklia wa Iran, suala ambalo limekuwa mwiba katika diplomasia ya kimataifa kwa miaka mingi.

    Msimamo wa Trump
    Akihitimisha maelezo yake, J.D. Vance amebainisha kuwa Rais Donald Trump ana imani kubwa kuwa muafaka wa aina hiyo unaweza kufikiwa. Kwa mujibu wa Vance, Trump anaamini kuwa chini ya uongozi wake, Marekani inaweza kutumia ushawishi wake kuhitimisha mzozo huo wa nyuklia kupitia makubaliano madhubuti.

  • Mradi wa ndege za kivita waangukia pua: Ufaransa na Ujerumani zashindwana ubabe

    Mradi wa ndege za kivita waangukia pua: Ufaransa na Ujerumani zashindwana ubabe

    PARIS, UFARANSA

    Ufaransa na Ujerumani zimeshindwa kuvunja ukuta wa kutoelewana uliodumu kwa miezi kadhaa kuhusu mradi wao wa pamoja wa kutengeneza ndege za kivita za kisasa (Next-Generation Fighter Jet), hatua inayozua maswali juu ya hatima ya ushirikiano huo wa kijeshi.

    Kwa mujibu wa taarifa iliyotolewa na Ikulu ya Ufaransa (Élysée) siku ya Jumatatu, kushindikana kwa makubaliano hayo kumekuja baada ya majadiliano ya kina yaliyofanyika wiki iliyopita kati ya Rais wa Ufaransa, Emmanuel Macron, na Kansela wa Ujerumani, Friedrich Merz.

    Taarifa hiyo imebainisha kuwa, baada ya tathmini ya viongozi hao, pande zote mbili zimefikia hitimisho kuwa makampuni ya ulinzi yanayohusika na mradi huo hayawezi kupiga hatua zaidi kutokana na kutofautiana kwa mitazamo na maslahi ya kiufundi.

    Aidha, Ikulu ya Élysée imeongeza kuwa mamlaka nchini Ujerumani zimeeleza kuwa haziwezi tena kuendelea kuyashinikiza makampuni hayo ya ulinzi kufikia mwafaka, jambo ambalo limekwamisha mchakato huo uliokuwa ukisubiriwa kwa hamu kuimarisha ulinzi wa Ulaya.

    Kukwama kwa mradi huu kunatajwa kuwa pigo kwa jitihada za nchi hizo mbili zenye nguvu barani Ulaya katika kuunganisha nguvu za kijeshi na teknolojia ya kisasa ya anga.

  • Uturuki na Venezuela Kuimarisha Ushirikiano wa Kiuchumi

    Uturuki na Venezuela Kuimarisha Ushirikiano wa Kiuchumi

    Rais wa Uturuki Recep Tayyip Erdoğan na Rais wa Mpito wa Venezuela Delcy Rodríguez wamejadili namna ya kupanua ushirikiano kati ya nchi hizo katika sekta za biashara, nishati na uchimbaji madini.

    Katika mazungumzo yao yaliyofanyika Jumatatu, viongozi hao walitathmini pia hatua mbalimbali zinazolenga kuongeza thamani ya biashara kati ya Uturuki na Venezuela kufikia dola za Marekani bilioni 3.

    Aidha, Erdoğan na Rodríguez walibadilishana mawazo kuhusu maendeleo ya kikanda na ya kimataifa yanayoendelea kwa sasa.

    Rais Erdoğan alithibitisha tena uungwaji mkono wa Uturuki kwa Venezuela na kusisitiza dhamira ya Ankara ya kuimarisha uhusiano na ushirikiano kati ya mataifa hayo katika sekta mbalimbali.

  • Jeshi la Anga la Taiwan laripotiwa kutaka kununua ndege za kivita za Rafale

    Jeshi la Anga la Taiwan laripotiwa kutaka kununua ndege za kivita za Rafale

    TAIPEI — Jeshi la Anga la Taiwan limekuwa katika jitihada za kununua kati ya ndege 50 hadi 60 za kivita aina ya Dassault Rafale F4 kutoka Ufaransa kwa karibu mwaka mmoja uliopita. Pia limeripotiwa kuonyesha nia ya kushiriki katika mpango wa baadaye wa Rafale F5.

    Hata hivyo, kulingana na jarida la anga Avions Légendaires, mazungumzo kuhusu mpango huo yamekwama. Sababu ya kusimama kwa mazungumzo hayo haielekezwi kwa upinzani kutoka kwa kampuni ya Dassault Aviation wala upande wa Taiwan.

    Taarifa zinaeleza kuwa wasiwasi wa kisiasa mjini Paris ndio unaochangia kusuasua kwa mazungumzo hayo. Serikali ya Ufaransa inadaiwa kuwa na tahadhari kuhusu athari zinazoweza kujitokeza katika uhusiano wake wa kidiplomasia na China endapo itaruhusu mauzo hayo.

    Taiwan tayari ina historia ya kununua ndege za kivita kutoka Ufaransa. Katika miaka ya 1990 ilinunua ndege 60 za Mirage 2000‑5, lakini kwa sasa ndege hizo zimeanza kuzeeka, hali inayochochea juhudi za Taipei kutafuta mbadala wa kisasa wa kuimarisha uwezo wa jeshi lake la anga.