Utaridi 2.0 Staging

Lebo: habari

  • Poland Yazipokea Ndege za Kisasa za Vita za Marekani.

    Poland Yazipokea Ndege za Kisasa za Vita za Marekani.

    Poland imepiga hatua kubwa katika kuimarisha ulinzi wake wa anga baada ya kuthibitisha kuwasili kwa ndege tatu za kwanza za kivita aina ya Lockheed Martin F-35 Lightning II zilizotengenezwa nchini Marekani. Ndege hizo zimetua rasmi katika Kambi ya Jeshi la Anga ya Łask, ikiwa ni sehemu ya mpango kabambe wa usambazaji wa ndege hizo utakaokamilika ifikapo mwaka 2029.

    Ujio wa ndege hizi ni mwendelezo wa mkataba mkubwa uliotiwa saini mwaka 2020 wakati wa muhula wa kwanza wa Rais Donald Trump. Katika mkataba huo wenye thamani ya dola bilioni 4.6, serikali ya Warsaw ilifanya oda ya jumla ya ndege 32 za kisasa aina ya F-35A.

    Taarifa kutoka jeshi la Poland zinasema kuwa marubani wa taifa hilo tayari wako nchini Marekani wakiendelea na mafunzo maalum ili kujiandaa kikamilifu kuendesha mashine hizo za vita zenye teknolojia ya hali ya juu.

    Hii inatazamwa kama hatua muhimu ya kuongeza nguvu ya kijeshi ya Poland na kuimarisha ushirikiano wa kiulinzi baina ya Warsaw na Washington.

  • Tulsi Gabbard Ajiuzulu Wadhifa wa Mkurugenzi wa Ujasusi wa Kitaifa kwa Sababu za Kifamilia.

    Tulsi Gabbard Ajiuzulu Wadhifa wa Mkurugenzi wa Ujasusi wa Kitaifa kwa Sababu za Kifamilia.

    Rais wa Marekani, Donald Trump, ametangaza rasmi kujiuzulu kwa Mkurugenzi wa Ujasusi wa Kitaifa, Tulsi Gabbard, hatua inayotajwa kulenga kutoa kipaumbele kwa matibabu ya mume wake, Abraham Williams.

    Katika taarifa iliyotolewa na Ikulu ya White House, Rais Trump amethibitisha kuwa Gabbard ataondoka rasmi katika utumishi wa serikali ifikapo tarehe 30 Juni, baada ya kufanya kazi ya “kipekee na ya ajabu.” Uamuzi huo umefuatia mazungumzo kati ya wawili hao katika Ofisi ya Oval (Oval Office) mapema leo.

    Rais Trump amebainisha kuwa sababu ya kuondoka kwa Gabbard ni hitaji la kuwa kando ya mume wake, ambaye amegundulika hivi karibuni kuwa na aina adimu sana ya saratani ya mifupa. Rais ameelezea kuguswa kwake na hali hiyo, huku akisisitiza kuwa uamuzi wa Gabbard wa kuweka kando majukumu ya kitaifa ili kupambana na vita hiyo ya kiafya pamoja na mumewe ni uamuzi wa haki na wa kupongezwa.

    “Tulsi amefanya kazi ya ajabu, na tutamkosa. Sina shaka kwamba Abraham atarejea katika hali yake njema hivi karibuni,” ilisema taarifa ya Rais.

    Kufuatia kuondoka huko, Rais Trump amemteua Aaron Lukas, ambaye kwa sasa ni Naibu Mkurugenzi Mkuu wa Ujasusi wa Kitaifa, kuwa Kaimu Mkurugenzi wa idara hiyo. Lukas, ambaye anatambulika kwa uzoefu na heshima kubwa ndani ya sekta ya ujasusi, anatazamiwa kuendeleza majukumu ya ofisi hiyo bila kuwepo kwa mkwamo wowote wa kiusalama.

    Hadi sasa, serikali haijatoa ufafanuzi zaidi kuhusu mchakato wa kumpata mrithi wa kudumu wa nafasi hiyo, huku macho ya wengi yakiwaelekea familia ya Gabbard katika kipindi hiki kigumu cha mapambano ya kiafya.

  • China na Urusi Zapanua Shughuli za Kijasusi Nchini Cuba

    China na Urusi Zapanua Shughuli za Kijasusi Nchini Cuba

    Ripoti mpya kutoka gazeti la The Wall Street Journal (WSJ) imebainisha kuwa nchi za Uchina na Urusi zimeongeza kwa kiasi kikubwa operesheni zao za kijasusi nchini Cuba katika kipindi cha miaka ya hivi karibuni.

    Kulingana na maafisa wa usalama, idadi ya wafanyakazi wa mataifa hayo wawili katika vituo vya ufuatiliaji wa kielektroniki nchini Cuba imeongezeka mara tatu tangu mwaka 2023. Hatua hii inaelezwa kuwa na lengo mahususi la kufuatilia mienendo ya kijeshi ya Marekani katika jimbo la Florida.

    Takwimu zinaonyesha kuwa, kati ya vituo 18 vya mawasiliano ya kijasusi (signals intelligence) vilivyopo nchini humo, Uchina inaendesha vituo vitatu huku Urusi ikiendesha viwili. Baadhi ya vituo hivyo vinasemekana kuendeshwa kwa ushirikiano wa karibu na serikali ya Cuba.

    Uchunguzi unaonyesha kuwa vituo hivyo vinalenga kufuatilia Kamandi Kuu ya Marekani (CENTCOM) iliyoko Tampa, na Kamandi ya Kusini (SOUTHCOM) inayopatikana karibu na mji wa Miami. Hata hivyo, maafisa wamebainisha kuwa mawasiliano mengi yanayonaswa na vituo hivyo ni yale yasiyo na hadhi ya siri.

    Afisa mwandamizi wa serikali ya Marekani amevitaja vituo hivi vilivyopo Cuba kuwa miongoni mwa machapio muhimu zaidi ya ujasusi ya Beijing na Moscow nje ya mipaka yao, huku kukiwa na hofu kuwa upanuzi zaidi unaweza kufanyika siku za usoni.

    Kufuatia uvumbuzi huo, utawala wa Rais Trump umeanza kuchukua hatua madhubuti za kuongeza shinikizo dhidi ya Cuba. Hatua hizo ni pamoja na kuimarisha ufuatiliaji wa angani kupitia safari za ndege zisizo na rubani (drones) zinazofanyika karibu kila siku, pamoja na kuelekeza upya setilaiti za kijasusi ili kukabiliana na tishio hilo linaloendelea kukua.

  • Qatar Yalaani Vikali Unyanyasaji wa Wanaharakati wa Flotilla kwa Mkono wa Israel.

    Qatar Yalaani Vikali Unyanyasaji wa Wanaharakati wa Flotilla kwa Mkono wa Israel.

    Serikali ya Qatar imetoa tamko kali la kulaani kitendo cha Waziri wa Usalama wa Taifa wa Israel cha kuwatesa na kuwanyanyasa wanaharakati wa kundi la Global Sumud Flotilla waliotiwa mbaroni na mamlaka za Israel.

    Katika taarifa iliyotolewa na Wizara ya Mambo ya Nje ya Qatar, hatua hiyo imetajwa kuwa ni ukiukaji mkubwa wa sheria za kimataifa za kibinadamu na kitendo kisicho na chembe ya ubinadamu.

    Wizara hiyo imesema kuwa unyanyasaji huu, unaofanywa hadharani dhidi ya wanaharakati kutoka mataifa yenye uhusiano na Israel, ni kielelezo tosha cha mateso ya kila siku wanayopitia wananchi wa Palestina chini ya mfumo wa ukaliaji na ubaguzi wa rangi kwa miongo mingi sasa.

    Qatar imesisitiza kuwa vitendo vya mawaziri katika serikali ya Israel havipaswi kutazamwa kama matukio ya kujitegemea, bali ni sehemu ya sera rasmi ya kimfumo ambayo haina heshima kwa utu wa binadamu wala haijali sheria za kimataifa au wito wa jumuiya ya kimataifa.

    Kufuatia hali hiyo, Wizara ya Mambo ya Nje ya Qatar imeitaka jumuiya ya kimataifa kuchukua hatua za haraka na za dharura ili kusitisha uchokozi wa Israel, kuwataka wanaharakati hao waachiliwe huru mara moja na bila masharti yoyote.

    Mwisho, Qatar imesisitiza kuwa ni wakati muafaka kwa mamlaka ya ukaliaji kuwajibishwa kwa uhalifu wake wa muda mrefu dhidi ya Wapalestina, na kukomesha utamaduni wa kutokujali sheria ambao umekuwa ukichochea vitendo hivyo kuendelea.

  • Taarifa Nyeti na za Siri Kubwa za Serikali ya Marekani Zafichuka Mtandaoni!

    Taarifa Nyeti na za Siri Kubwa za Serikali ya Marekani Zafichuka Mtandaoni!

    WASHINGTON – Watafiti wa usalama wa kimtandao wameripoti kuvuja kwa kiasi kikubwa cha taarifa za siri za serikali ya Marekani; tukio ambalo baadhi ya wataalamu wamelielezea kama moja ya uvujaji mbaya na wa kihistoria kuwahi kuikumba serikali ya nchi hiyo.

    Sakata hili lilianza pale mtafiti wa masuala ya usalama, Guillaume Valdon, alipogundua hifadhi ya umma (public repository) kwenye mtandao wa GitHub iliyopewa jina la “private-cisa”.

    Hifadhi hiyo ilikuwa wazi kwa umma na ilibeba taarifa nyeti sana zinazohusu Shirika la Usalama wa Mtandao na Miundombinu la Marekani (CISA). Inaarifiwa kuwa hifadhi hiyo ilikuwa inasimamiwa na kampuni ya ukandarasi ya serikali ijulikanayo kama “Nightwing”.

    Miongoni mwa faili zilizovuja ni pamoja na funguo za usimamizi za huduma ya wingu ya “AWS GovCloud”, tokeni za ufikiaji, majina ya watumiaji na nywila (passwords) za ndani, funguo za SSH, na hata faili zilizokuwa na taarifa za kuingia (login info) za wafanyakazi.

    Zaidi ya hayo, taarifa zinazohusu mifumo ya ndani ya uundaji wa programu na miundombinu ya kiusalama ya serikali ya Marekani nazo zilikutwa ndani ya hifadhi hiyo.

    Katika maelezo yake, Bw. Valdon alisema kuwa mwanzoni alidhani data hizo zilikuwa za uongo, kwani ukubwa na unyeti wa taarifa zilizovuja ulikuwa ni wa kiwango cha kutokuaminika.

    Alitaja tukio hili kuwa “uvujaji mbaya zaidi wa taarifa kuwahi kutokea katika kipindi chake chote cha kazi”, na kuongeza kuwa hifadhi hiyo ilifichua hadi maelezo ya kina ya jinsi programu za ndani za serikali ya Marekani zinavyoundwa na kusambazwa.

    Kufuatia taarifa na tahadhari iliyotolewa na watafiti hao, hifadhi hiyo ya GitHub ilifungwa na kuondolewa hewani mara moja. Hata hivyo, kampuni ya “Nightwing” imekataa kuzungumzia suala hilo moja kwa moja hadi sasa.

  • Universal Pictures na Michael Bay Kuandaa Kilamu ya Uokoaji wa Marubani wa Marekani Nchini Iran.

    Universal Pictures na Michael Bay Kuandaa Kilamu ya Uokoaji wa Marubani wa Marekani Nchini Iran.

    Kampuni ya utayarishaji wa filamu ya Universal Pictures, kwa kushirikiana na mwongozaji mahiri Michael Bay, imetangaza mipango ya kuandaa filamu mpya itakayoelezea kisa cha kusisimua cha uokoaji wa marubani wawili wa Jeshi la Anga la Marekani nchini Iran.

    Kwa mujibu wa jarida la Deadline, tukio hilo lilitokea kufuatia kudunguliwa kwa ndege yao aina ya F-15E Strike Eagle wakati wa Operesheni iliyopewa jina la “Epic Fury.”

    Filamu hiyo inatarajiwa kuakisi maudhui ya kitabu kipya cha mwandishi Mitchell Zuckoff, kinachotarajiwa kuchapishwa mwaka wa 2027.

    Akizungumza na Deadline, Michael Bay ameeleza kuwa anatarajia ushirikiano wa karibu na vyombo vya ulinzi vya Marekani, akibainisha kuwa amekuwa na uhusiano mzuri wa kikazi na Idara ya Vita pamoja na wanajeshi wa Marekani kwa miaka mingi. Kauli hii imezua hisia kuwa mradi huo unaweza kupata ridhaa na ushirikiano wa moja kwa moja kutoka Pentagon.

    Bay amesisitiza kuwa filamu hiyo itatoa heshima kwa wanajeshi waliofanikisha operesheni hiyo, ambayo ameitaja kuwa ni miongoni mwa misheni ngumu, tata, na zenye hatari kubwa zaidi kuwahi kushuhudiwa katika historia ya hivi karibuni ya kijeshi.

    Hadi sasa, maelezo zaidi kuhusu waigizaji au tarehe kamili ya kuanza kwa utayarishaji hayajawekwa wazi.