Utaridi 2.0 Staging

Kategoria: Uncategorized

  • Kenya kuanza kuzoa mapato ya mafuta Ghafi ya Turkana

    Kenya kuanza kuzoa mapato ya mafuta Ghafi ya Turkana

    AFUENI KWA KENYA BAADA YA KUANZA kuzalisha mafuta kabla ya mwisho wa mwaka huu kutoka kaunti ya Turkana kaskazini mwa nchi.

    Waziri wa Kawi na Mafuta Opiyo Wandayi hivyo Ijumaa Juni 5, 2026 alifafanua kuwa ni mafuta ghafi yatakayozalishwa na kuuzwa ng’ambo kusafishwa kutoa petroli, dizeli na bidhaa nyininezo.

    “Kabla ya mwisho wa mwaka huu tutaanza kuzalisha mafuta kutoka Turkana. Baada ya muda mrefu hatimaye utekelezaji wa mradi huu umepiga hatua hadi kufikia kiwango cha uzalishaji,” akaeleza kwenye mahojiano katika Radio Jambo, akiutaja mradi huo kama yenye umuhimu mkubwa katika sekta ya kawi.

    “Mafuta ghafi kutoka Turkana yatauzwa ng’ambo kwa sababu wakati huu hatuma kiwanda cha kusafisha mafuta. Mapato kutkana na uuzaji wa mafuta hayo yatafaidi Wakenya wote sio tu wakazi wa Turkana,” Bw Wandayi akaeleza.

    Mwezi jana, Rais William Ruto alifichua mpango wa kuanzishwa kwa kiwanda cha kusafisha mafuta katika ukanda wa Afrika Mashariki, kwa ushirikiano na bwanyenye wa Nigeria Aliko Dangote.

    Alisema kuwa kampuni hiyo itaanzishwa eneo la Tanga, nchini Tanzania.

    Kampuni ya Gulf Energy Ltd ndio itakuwa ikichimba mafuta kutoka visima vilivyoko Lokichar, eneo bunge la Turkana Kusini.

    Kampuni hiyo ilitwaa usimamizi wa mradi huo baada ya kutwaa shughuli ya mali ya kampuni ya Tullow Oil, ya Uingereza, iliyoanzisha uchimbaji wa mafuta eneo hilo miaka 10 iliyopita.

    Wakati huu Kenya hununua mafuta yaliyosafishwa kutoka ukanda wa Mashariki ya Kati, linaloshuhudia vita kati ya Amerika na Iran.

    Vita hivyo vilivyoanza Februari 28, vimevuruga usafirishaji wa bidhaa hiyo kupitia Mkondo wa Hormuz, hali ambayo imechangia kupanda kwa bei ya mafuta nchini.

    Hata hivyo, mapema wiki huu Waziri Wandayi alielezea matumaini  kuwa bei ya mafuta itashuka hivi karibuni, baada ya serikali kuanza kupata mafuta kwingineko, hali itakayoleta afueni kwa Wakenya

  • Katz: “Hakuna Kusitisha Mapigano Nchini Lebanon

    Katz: “Hakuna Kusitisha Mapigano Nchini Lebanon

    “Waziri wa Ulinzi wa Israel, Israel Katz, ametoa tamko zito kuhusu hali ya usalama nchini Lebanon, akisisitiza kuwa hakuna makubaliano yoyote ya kusitisha mapigano yanayoendelea katika eneo hilo.

    Katika taarifa yake, Waziri Katz ameweka bayana kuwa jeshi la Israel litaendelea na operesheni zake dhidi ya ‘kundi la Wapinzani’ bila kupumzika.

    Tamko hili linakuja kinyume na taarifa za awali ambazo zilikuwa zikidokeza kuwa huenda kukawa na kulegeza kamba au kupungua kwa mvutano katika mpaka wa Israel na Lebanon kufuatia mazungumzo ya kidiplomasia.

    Hadi sasa, hali inasalia kuwa tete huku jeshi la Israel likionekana kuongeza kasi ya mashambulio yake, hatua ambayo wachambuzi wanaiita kuwa ni ishara ya kuendeleza msukumo wa kijeshi licha ya shinikizo la kimataifa la kutafuta amani.

  • Waziri wa hazina wa Marekani kupitia Fox News: Nini Maana ya ‘Kumaliza Kazi’

    Waziri wa hazina wa Marekani kupitia Fox News: Nini Maana ya ‘Kumaliza Kazi’

    Waziri wa Hazina wa Marekani amesema katika mahojiano na Fox News kwamba Marekani inaweka mbele masuala matatu kama kigezo cha “kumaliza kazi” katika mazungumzo yanayohusiana na Iran, huku akirudia madai ya Washington dhidi ya Tehran.

    Katika kauli yake, Waziri huyo alidai kuwa “kumaliza kazi” kunamaanisha kuhakikisha Mlango-Bahari wa Hormuz unabaki wazi, kuchukua urani iliyorutubishwa kwa kiwango cha juu, na kuhakikisha Iran haina silaha ya nyuklia.

    Wakati huohuo, Iran imesisitiza haki yake ya mamlaka juu ya Mlango-Bahari wa Hormuz na imeeleza kupinga kwake wazo la kukabidhi Marekani urani yenye kiwango cha juu cha urutubishaji.

    Kauli hizi zinatolewa huku vyombo vya habari vya Marekani, CNN na CBS, vikiripoti hapo awali kuhusu kile walichokitaja kuwa ni matakwa makubwa ya Donald Trump katika duru ya mwisho ya mazungumzo kupitia wapatanishi, pamoja na “mabadiliko makubwa” yanayodaiwa kuingizwa kwenye maandishi ya hati ya maelewano.

  • Sayid Mojtaba Khamenei: Vituo vya Marekani katika eneo ni lazima vifungwe

    Sayid Mojtaba Khamenei: Vituo vya Marekani katika eneo ni lazima vifungwe

    Tuna nchi kumi na tano jirani, miongoni mwao zipo kwenye nchi kavu na zengine baharini, na tumekuwa tayari kila wakati kuanzisha uhusiano mzuri pamoja na kila nchi, lakini baadhi ya nchi hizi zimewekewa misingi yenye kulenga udhibiti katika eneo … napendekeza kwamba misingi hii ifungwe haraka iwezekanavyo.

    ✍🏼 Sehemu ya ujumbe wa kwanza wa Ayatullah Seyyed Mojtaba Hosseini Khamenei, Kiongozi Muadhamu wa Mapinduzi ya Kiislamu.

  • Iran YAKATAA MABAVU ya Trump, Hatujafikia mapatano yoyote na Marekani

    Iran YAKATAA MABAVU ya Trump, Hatujafikia mapatano yoyote na Marekani

    Msemaji wa Wizara ya Mambo ya Nje ya Iran amesema Ijumaa kwamba mabadilishano ya ujumbe kati ya Iran na yanaendelea, lakini hadi sasa hakuna mwafaka wa mwisho uliofikiwa huku akisisitiza kuwa Tehran haikubali lugha ya mabavu.

    Esmaeil Baghaei amesema katika mahojiano na televisheni ya taifa ya Iran kwamba: “Tuliagana na lugha ya mabavu miaka 47 iliyopita.” Ameongeza kusema: “Hakuna dola lolote la Magharibi linaloweza kutumia lugha ya ‘kulazimisha’ katika mazungumzo na Jamhuri ya Kiislamu ya Iran. Tunafanya maamuzi yetu wenyewe kwa kuzingatia maslahi na haki za taifa la Iran.”

    Kauli zake zilikuja saa chache baada ya Rais wa Marekani Donald Trump kudai kwenye mtandao wa kijamii wa Truth Social kwamba lazima usimamizi wa Iran katika Mlango wa Hormuz uondolewa. Pia alidai kwamba uamuzi kuhusu makubaliano na Iran utachukuliwa hivi karibuni.

    Iran ilifunga Mlango wa Hormuz kwa maadui zake na washirika wao baada ya kuanza vita vya kichokozi vya Marekani na Israel dhidi yake tarehe 28 Februari na kuendelea kwa siku 40. Mamlaka za Iran zilianza kutekeleza udhibiti mkali zaidi mwezi uliopita kufuatia tangazo la Trump kuhusu kutekelezwa mzingiro uliolenga meli na bandari za Iran.

    Iran imesema hatua hizo za Trump zinakiuka masharti ya usitishaji mapigano na kwamba baadaye ziliongezwa kwa upande mmoja na Washington.

    Mazungumzo yasiyo ya moja kwa moja kati ya Iran na Marekani, yanayosimamiwa na Pakistan na kuratibiwa na Qatar, yanaendelea kwa msingi wa pendekezo la vipengele 14 la Jamhuri ya Kiislamu. Lengo lake ni kufikiwa kwa hati ya makubaliano ya kumaliza vita vya Marekani na Israel dhidi ya Iran, kusitishwa uhasama wa Marekani baharini, na  kuachiliwa kwa mali za Iran zilizozuiwa.

    Baghaei amesisitiza kwamba Mlango wa Hormuz uko ndani ya maji ya kieneo ya Iran na Oman na hivyo ni nchi hizo mbili jirani zitakzoamua kuhusu usimamizi wa eneo hilo.

  • Kauli ya Marekani Baada ya Kenya Kusitisha Ujenzi wa Kituo cha Ebola nchini humo

    Kauli ya Marekani Baada ya Kenya Kusitisha Ujenzi wa Kituo cha Ebola nchini humo

    Mahakama Kuu ya Kenya imesitisha kwa muda kuanzishwa kituo cha karantini kwa wagonjwa wa Ebola raia wa Marekani, kilichotarajiwa kujengwa nchini humo. Kufuatia uamuzi huo, wakuu wa Marekani wamedai kuwa  watashughulikia hofu ya Wakenya kuhusiana na kituo hicho.

    Taarifa ya Jumamosi kutoka Ofisi ya Jeremy P. Lewin, Naibu Waziri wa Mambo ya Nje wa Marekani anayeshughulikia Misaada wa Kigeni, imesema: “Tumejulishwa kuhusu hatua ya mahakama nchini Kenya dhidi ya kituo cha kutenga wagonjwa wa Ebola. Tunawasiliana na mamlaka za Kenya na tuna matumaini kuwa tunaweza kutatua pingamizi hiyo.”

    Taarifa hiyo ni majibu ya kwanza ya hadharani kutoka Washington tangu Mahakama Kuu ya Kenya isimamishe mpango wa kuanzisha au kuanza kufanya kazi kituo hicho, hadi pale shauri la kikatiba litakaposikilizwa na kuamuliwa.

    Jaji Patricia Nyaundi alitoa maagizo hayo Ijumaa baada ya kundi la kutetea haki kupinga mradi huo, likisema kuwa unazua masuala ya kikatiba na ya maslahi ya umma yanayohitaji mapitio ya kimahakama.

    Kituo hicho kilichopendekezwa kimeibua mjadala mkali nchini Kenya, kufuatia taarifa kwamba kitatumika kuwashguhulikia raia wa Marekani wanaoweza kuwa wameathiriwa na Ebola wakati wa mlipuko unaoendelea katika Jamhuri ya Kidemokrasia ya Congo. Kauli ya Waziri wa Mambo ya Nje wa Marekani, Marco Rubio, kuwa Marekani haitawaruhusu kuingia nchini humo waathirika au washukiwa wa ugonjwa wa Ebola na kwamba watatibiwa katika nchi nyingine imewakasirisha sana Wakenya wanaoona kwamba nchi yao inatumiwa kama jaa la taka na Marekani.

    Wizara ya Afya ya Kenya imeutetea mpango wa kujenga kituo hicho na kusema ni sehemu ya ushirikiano wa kimataifa kuhusu kukabiliana na magonjwa kwa kuzingatia kanuni zote la afya.

    Muungano wa Madaktari Kenya (KMPDU) umeitaka serikali iwe na uwazi kamili kuhusu makubaliano yoyote yanayohusiana na kituo hicho kilichopendekezwa, ukisema masuala ya afya ya umma na usalama yanapaswa kujadiliwa wazi kabla ya mpango wowote kama huo kusonga mbele.