Utaridi 2.0 Staging

Lebo: Ufaransa

  • Dassault Aviation Yataka Fidia kutoka Airbus Kufuatia Kusitishwa kwa Ununuzi wa Eurodrone nchini Ufaransa

    Dassault Aviation Yataka Fidia kutoka Airbus Kufuatia Kusitishwa kwa Ununuzi wa Eurodrone nchini Ufaransa

    PARIS – Kampuni ya utengenezaji wa ndege ya Dassault Aviation imetangaza nia yake ya kudai fidia kutoka kwa Airbus, kufuatia hatua ya Ufaransa kusitisha mpango wa ununuzi wa ndege zisizo na rubani za Eurodrone, mradi wenye thamani ya Euro bilioni 7.

    Kulingana na ripoti ya shirika la habari la Reuters, uamuzi huo wa Ufaransa umeathiri moja kwa moja mfumo wa “geo-return” wa programu hiyo, hali iliyopunguza kiwango cha kazi ambacho makampuni ya Ufaransa yalitarajiwa kufanya katika mradi huo.

    Ingawa serikali ya Ufaransa haijajiondoa rasmi katika mradi huo wa Eurodrone, bajeti ya hivi karibuni ya ulinzi imeondoa kabisa ufadhili wa ununuzi wa ndege hizo hadi kufikia mwaka 2035. Maafisa wa ulinzi wameeleza kuwa uamuzi huo umetokana na upatikanaji wa njia mbadala za bei nafuu, ambazo zinaonekana kuendana zaidi na mahitaji ya vita vya kisasa vya kiwango cha juu.

    Akijibu hatua hiyo, msemaji wa Dassault amesisitiza kuwa kampuni hiyo inapaswa kufidiwa kwa uwekezaji iliofanya katika mradi huo, ambao sasa umeathiriwa na mabadiliko ya ghafla ya manunuzi.

    Kwa upande mwingine, Airbus imetoa taarifa ikibainisha kuwa ina imani mradi wa Eurodrone utaendelea kama ulivyopangwa, ingawa sasa utafanyiwa marekebisho ya kimfumo ili kukabiliana na changamoto za sasa.

  • Mradi wa ndege za kivita waangukia pua: Ufaransa na Ujerumani zashindwana ubabe

    Mradi wa ndege za kivita waangukia pua: Ufaransa na Ujerumani zashindwana ubabe

    PARIS, UFARANSA

    Ufaransa na Ujerumani zimeshindwa kuvunja ukuta wa kutoelewana uliodumu kwa miezi kadhaa kuhusu mradi wao wa pamoja wa kutengeneza ndege za kivita za kisasa (Next-Generation Fighter Jet), hatua inayozua maswali juu ya hatima ya ushirikiano huo wa kijeshi.

    Kwa mujibu wa taarifa iliyotolewa na Ikulu ya Ufaransa (Élysée) siku ya Jumatatu, kushindikana kwa makubaliano hayo kumekuja baada ya majadiliano ya kina yaliyofanyika wiki iliyopita kati ya Rais wa Ufaransa, Emmanuel Macron, na Kansela wa Ujerumani, Friedrich Merz.

    Taarifa hiyo imebainisha kuwa, baada ya tathmini ya viongozi hao, pande zote mbili zimefikia hitimisho kuwa makampuni ya ulinzi yanayohusika na mradi huo hayawezi kupiga hatua zaidi kutokana na kutofautiana kwa mitazamo na maslahi ya kiufundi.

    Aidha, Ikulu ya Élysée imeongeza kuwa mamlaka nchini Ujerumani zimeeleza kuwa haziwezi tena kuendelea kuyashinikiza makampuni hayo ya ulinzi kufikia mwafaka, jambo ambalo limekwamisha mchakato huo uliokuwa ukisubiriwa kwa hamu kuimarisha ulinzi wa Ulaya.

    Kukwama kwa mradi huu kunatajwa kuwa pigo kwa jitihada za nchi hizo mbili zenye nguvu barani Ulaya katika kuunganisha nguvu za kijeshi na teknolojia ya kisasa ya anga.

  • Jeshi la Anga la Taiwan laripotiwa kutaka kununua ndege za kivita za Rafale

    Jeshi la Anga la Taiwan laripotiwa kutaka kununua ndege za kivita za Rafale

    TAIPEI — Jeshi la Anga la Taiwan limekuwa katika jitihada za kununua kati ya ndege 50 hadi 60 za kivita aina ya Dassault Rafale F4 kutoka Ufaransa kwa karibu mwaka mmoja uliopita. Pia limeripotiwa kuonyesha nia ya kushiriki katika mpango wa baadaye wa Rafale F5.

    Hata hivyo, kulingana na jarida la anga Avions Légendaires, mazungumzo kuhusu mpango huo yamekwama. Sababu ya kusimama kwa mazungumzo hayo haielekezwi kwa upinzani kutoka kwa kampuni ya Dassault Aviation wala upande wa Taiwan.

    Taarifa zinaeleza kuwa wasiwasi wa kisiasa mjini Paris ndio unaochangia kusuasua kwa mazungumzo hayo. Serikali ya Ufaransa inadaiwa kuwa na tahadhari kuhusu athari zinazoweza kujitokeza katika uhusiano wake wa kidiplomasia na China endapo itaruhusu mauzo hayo.

    Taiwan tayari ina historia ya kununua ndege za kivita kutoka Ufaransa. Katika miaka ya 1990 ilinunua ndege 60 za Mirage 2000‑5, lakini kwa sasa ndege hizo zimeanza kuzeeka, hali inayochochea juhudi za Taipei kutafuta mbadala wa kisasa wa kuimarisha uwezo wa jeshi lake la anga.

  • Ufaransa yanzisha uchunguzi wa kimataifa dhidi ya Israel kwa uhalifu wa kivita na utesaji

    Ufaransa yanzisha uchunguzi wa kimataifa dhidi ya Israel kwa uhalifu wa kivita na utesaji

    PARIS, UFARANSA – Serikali ya Ufaransa imetangaza rasmi kuanzisha uchunguzi wa kina wa jinai dhidi ya utawala wa Israel, kufuatia tuhuma nzito za uhalifu wa kivita na utesaji dhidi ya raia wake waliokamatwa.

    Uchunguzi huo unalenga kubaini ukweli kuhusu matukio yaliyotokea tarehe 18 Mei, ambapo majeshi ya Israel yaliingilia kati msafara wa misaada ya kibinadamu uliokuwa ukielekea Ukanda wa Gaza na kuwakamata wanaharakati waliokuwa ndani yake.

    Hatua hii ya Ufaransa imekuja baada ya kuibuka kwa malalamiko ya kushtua kutoka kwa wanaharakati hao wa Kifaransa, wakidai kufanyiwa vitendo vya kikatili wakiwa kizuizini. Miongoni mwa tuhuma hizo ni pamoja na vipigo, unyanyasaji wa kijinsia, na vitendo vinavyodhalilisha utu wa binadamu.

    Wachambuzi wa masuala ya kidiplomasia wanaona hatua hii kama ishara ya kuongezeka kwa shinikizo la kimataifa dhidi ya Israel kuhusu mbinu zake za usalama, hususan katika eneo la Ukanda wa Gaza lenye mvutano wa muda mrefu.

    Mpaka sasa, utawala wa Kizayuni wa Israel haujatoa tamko rasmi kuhusiana na hatua hiyo ya Ufaransa, huku ulimwengu ukisubiri kuona ni hatua gani za kisheria zitachukuliwa pindi uchunguzi huo utakapokamilika.

  • Jasusi wa Ufaransa ahukukumiwa miaka 20 jela nchini Mali kwa uhujumu uchumi

    Jasusi wa Ufaransa ahukukumiwa miaka 20 jela nchini Mali kwa uhujumu uchumi

    BAMAKO, MALI – Serikali ya mpito nchini Mali imetoa hukumu nzito ya kifungo cha miaka 20 jela dhidi ya afisa wa ujasusi wa Ufaransa, baada ya kumpata na hatia ya kuhujumu usalama wa taifa.

    Afisa huyo, Luteni Kanali Yann Vézilier, ambaye alikuwa akifanya kazi katika ubalozi wa Ufaransa jijini Bamako chini ya mwamvuli wa kidiplomasia, alitiwa mbaroni mwezi Agosti mwaka 2025.

    Kwa mujibu wa mashtaka yaliyowasilishwa mahakamani, Vézilier alikamatwa akiwa pamoja na baadhi ya maafisa wa jeshi la Mali. Inadaiwa kuwa alikuwa akiratibu njama za kupindua serikali ya kijeshi iliyopo madarakani kwa msaada wa Shirika la Ujasusi la Ufaransa (DGSE).

    Hata hivyo, serikali ya Ufaransa imekanusha vikali madai hayo, ikiyataja kuwa hayana msingi wowote wa kisheria wala ukweli, na ni jaribio la kuichafua taswira ya nchi hiyo.

    Tukio hili linakuja huku kukiwa na mivutano ya muda mrefu ya kidiplomasia kati ya Mali na Ufaransa, mkoloni wa zamani wa nchi hiyo, mivutano ambayo imepelekea nchi hiyo ya Afrika Magharibi kujikita zaidi katika ushirikiano na mataifa mengine, ikiwemo Urusi.

    Hadi sasa, serikali ya Ufaransa haijaweka wazi hatua zaidi itakazochukua kufuatia hukumu hiyo ya kihistoria dhidi ya afisa wake.

  • Ufaransa Yampiga Marufuku Waziri wa Usalama wa Israel Kuingia Nchini Humo

    Ufaransa Yampiga Marufuku Waziri wa Usalama wa Israel Kuingia Nchini Humo

    PARIS – Serikali ya Ufaransa imempiga marufuku Waziri wa Usalama wa Taifa wa Israel, Itamar Ben-Gvir, kuingia katika ardhi ya taifa hilo, kufuatia kile kilichotajwa kuwa ni mienendo isiyokubalika dhidi ya raia wa Ufaransa na Ulaya.

    Akithibitisha hatua hiyo, Waziri wa Mambo ya Nje wa Ufaransa, Jean-Noël Barrot amesema: “Kuanzia leo, Itamar Ben-Gvir amepigwa marufuku kuingia katika ardhi ya Ufaransa. Uamuzi huu unafuatia vitendo vyake viovu dhidi ya raia wa Ufaransa na Ulaya waliokuwa abiria kwenye msafara wa meli za Global Sumud Flotilla.”Waziri Barrot alisisitiza msimamo wa nchi yake akisema kuwa, Ufaransa haiwezi kuvumilia kuona raia wake wakitishiwa au kufanyiwa ukatili wa namna hiyo, hasa ikifanywa na afisa wa umma.

    Alibainisha kuwa vitendo hivyo ni muendelezo wa mfululizo wa kauli na matendo ya kushtusha, ikiwemo uchochezi wa chuki na ghasia dhidi ya Wapalestina. Aidha, ameeleza kuwa akishirikiana na mwenzake wa Italia, wameuomba Umoja wa Ulaya (EU) kumwekea vikwazo waziri huyo.

    Hatua hii kali inakuja muda mfupi baada ya Ben-Gvir kuchapisha video mtandaoni ikimuonyesha akiwadhihaki wanaharakati wa Gaza waliokamatwa na vikosi vya Israel. Katika video hiyo, wanaharakati hao walionekana wakiwa wamefungwa vitambaa machoni, wamepiga magoti na kufungwa mikono yao katika Bandari ya Ashdod.

    Tukio hilo limeibua shutuma kali kimataifa, kiasi cha kumfanya Waziri Mkuu wa Israel, Benjamin Netanyahu, kukaririwa akisema kuwa mwenendo wa Ben-Gvir “hauendani na maadili na kanuni za Israel.”Kufuatia uamuzi huu, Ufaransa inakuwa nchi ya kwanza barani Ulaya kuchukua hatua kwa vitendo, huku wimbi la shinikizo la kidiplomasia likizidi kusambaa.

    Waziri Mkuu wa Uhispania tayari ametangaza kuanzisha juhudi za kuwapiga marufuku mawaziri wa Israel kuingia ndani ya nchi za Umoja wa Ulaya (EU), na Italia inashinikiza vikwazo vya pamoja vya EU. Aidha, imeripotiwa kuwa Croatia imegoma kumpokea balozi wa Israel kwa takriban miezi saba sasa.